موسوعة شعراء العاميه المصريه / عمرو المصرى

شق القمر

فجأة ولقيتك يا قمر..
بتشق بإيديك السحاب
حتى النجوم
فكت إيديها وسعت
فاتشكلت صورة ملامحك ف الفضا
حكم القضا ..
مكتوب على جبين الزمن
إنتي انتمائي للوطن
إنتي يا صفصافة أمل ..
والقلب تكعيبة
مدّي إيديكي اتشعلقي وارمي فروعك ع الملأ
من بعد ما قلبي اتسرق
مابقتش اخاف
حلمي اللي مصلوب ع الورق ..
قام انتفض لحظة ماعيني بتنظرك آخر المطاف
يا شمس فوق خدي أنا وف قلبي دفيانة
وما بين شعورك سكتي
وبتكتر المشاوير
يا ام العيون ..
قبضت على كل العبارات التي ..
اتشكلت منها القصيدة بداخلي
يا ام العيون .. بتشدني ..
أخر حدودي للسما
وكإنما ..
متجمعة فيها الحياة
كل الفصول الأربعة
وف قلبي قاعدة مربعة
خليتي نبض القلب بيجلجل على القضبان
فاتح سنافور الهوى للريح
عينه بتوّصل للمدى
أيامي يا كراكيب وكم كانت ف علبة صفيح
نبت في جدرانها الصدى
والنظرة من عينك كما حبة ندى
بترد فيها الروح
والقلب وردة مفتحة
طعم الندي ع الورد مابيكفيش
خليني اعيش هايم ما بين القبتين
واتدارى في شق القمر
مَنْ ذا الذي أسرى بقلبي
مِنْ حنينِ لا يضاهيه الحنين
متمنياً ؛ أن امتطي صهوة براقي محلقاً فوق الجبين
كل النساء حبيبتي وهمٌ
وانتي اللي قدامي يقين
كل العيون الــ قبل منك ..
كلها بلاستيك
وأنا اللي نايم بين شفايفك من سنين
وانا من سنين ..
بيني وبين الحلم يمكن مش كتير
مجنون انا بشفايفك الـ مليانة بالتعبير
مجنون انا وعارف ..
جـِنان العشق أمره خطير
واكمني حبيت وبضمير ..
أصبحتُ متهماً وبالتكفير
ياه إنتي ياه ..
إنتي اللي في عينيكي طرح يأسي حياة
إنتي اللي ف إيديكي رقص كل البنفسج
ويا أغصان الكلام
إنتي اللي فوق خدك نطق صمت الرخام
إنتي اللي لونتي السما بلون السلام
إنتي الإمام والقلب درويشك
وأنا المتيم في الهوى
بامشي على نهج الغرام
ــ مش برضه مسموح ف الهوى تبقي الإمام ــ
فلتأذني , إني أقولك باعشقك
وتقبلي عشقي مع خالص التقدير
مش قلت لِك ..
مجنون انا وعارف ..
جِنان العشق أمره خطير .









"ضاقت ولما استحكمت"
فتحكِمت فىّ
وأنا اللي بالوهم ابتليت
بافحت بفاس العشق في بحر الهوى
أنا يا أنا يا سكة الأوهام ..
كوابيس على أحلام ..
مكتومة أنفاسها
عَضعض يا موج اليأس وبراحتك
في لحم المركب البايش
أحلامي معروضه ..
على المانيكان
أحلامي مصلوبه علي الجدران
وف الهامش
الاسم عايش للأسف
ولكني مش عايش
معجون يا بحر العشق بترابك
والشط نبّت بالحصى
أنا من عصى العشق اللي طارح في الوريد
والخوف معشش تحت جلدي من زمن
الخوف من الجرح الجديد ..
ليكون تمن لمغامرة خسرانه
دمع ؛ يا نن القلب ما تدمّع
لسه الصداع في القلب ومسمّع
نفسي ف كيسين "كتافست" ادوّبْهم لاوجاعي
يا عشق ..
يا نايم على دراعي مكان كفني ..
طعم الجراح أحلو من دمعي
والنور بيستطعم ضياه
لحظة بُكا شمعي
سمعي أنا اللي خف من عيني
ولاّ انطرح جمعي
وكأني لقطة اتكسرت
ساعة ما تتسرسب خيوط نولها
حتى العواطف ميتة في القلب يبنوا لها
مين اللي بينولها
إلا اللي مش محتاج
يا أيها السر اللي لَابِــد ف الحشا ..
عمّال اداري وللأسف
دمعي وَشى
متوحشة الدنيا كما إنتي هى , متوحشة
وانا لسه مش عارف..
مجني عليا أنا ..
ولا أكون جاني
أنا ليه باشوفني رقصت ع السلم
ولاّ تكون سكينتي سرقاني .







































ألوان الطيف..
اللي بتتكوّن على طرف شفايفك..
والمرسومة بشكل جناح الطير
وكتير باتمنى أكون صياد
وارمي لك فوق خدي النبض الطُعم
أو أزرع فوق صدري العشب
علشان ماتحطي عليه بشفايفك
وانا شايفك ..
وكإن شعاع الشمس المتنكر على شكل البدر
لما إيديكي بتفتح باب الصبح..
لعصافير الجنة الساكنة تحت سبايك ضيك
بيخليني القلب المحتل
ولما سمعت ف نشرة أخبار الساعة اياها ..
بإن الشمس ممكن تتأخر عني شوية..
ساعتها عرفت بأن ميزان العالم حتماُ يختل
يااااا مَنْ ..
قد مَنْ الله عليَّ بحُبْك ..
خليني أخربش وش البحر
علشان تظهر صورتك ..
على أغلفة الدواوين الشعرية
خليني أطرد حارس عينك
وأعين نفسي مكانه
خليني استكشف وسط حروف اللغة الضاد
عن حرف جديد يتسجل باسمك
عن بدر تملي ف ليلة أربعتاشر
عن أحلى قصيدة حب اتكتبت
عبر عصور الشعر
أو عن مسألة حسابية
ــ طبعاً ف عينيكي يكون الحل ــ
طب قولي ازاي
ممكن أصدق بعدك عني
مع إني ..
لو قالوا بإن الكرة الأرضية
أجازة من الدوارن ..
ممكن , عادي
لكن بعدك عني أصعب و أجل
لإنك أكبر من أي كلام في عيون الناس
وان الإحساس اللي بيتمطع ف عروقي
مكان الدم ..
هو اللي معيشني
وان النظرة الخارجة من نن عنيكي ..
عمّال اتحايل , يمكن يوم ترحمني
مع إني عزيز ..
بين أهله اتذل
إنتي بين كل نساء الدنيا اللاتي..
لا يعرفن اللف ولا الدوران
عرفت بأني بأعشقها بدرجة جيد جداً
وإني مهما وصلت لأعلى درجات التعليم ..
في العشق الساكن فيا
واللي مقرر تدريسه في كل مراحل تعليم الحب ..
ضعيفٌ جداً
وعليّ إني اتعلم من تاني
مع إني باعاني
وسط حواري الروح المنهارة
والمحتارة ف زحمه من المخاليق
مش لاقية طريق
بين الشمس وبين الضل
لإنك , وسط بنات أفكاري
اللي بتتمايل , واللي بتتحايل ..
يوم تشغلني
إنتي وبس باشوفك فيهم
وانك ف عينيا ..
أجمل ما أبدعه الله عز وجل.