موسوعة شعراء العاميه المصريه /محمد البهنساوى
صفحة 1 من اصل 1
موسوعة شعراء العاميه المصريه /محمد البهنساوى
يا قطر الصعيد
بالحق يا قطر الصعيد
الهيئة وانت في الحضيض
في البدرشين أو منفلوط
غــــاوي تدوسنا ف كل شوط
للحــــق في الإجرام عتيد
في القتل قلبك من حديد
***
يا قطر قوللي حكايتك ايه ؟!!
عندي سؤال جاوب عليه
ماشي بتجـــــري بدون حساب
تقتل في أطفالنا وشباب
عطشان لـــدم ولادنا ليه؟
***
النيل يمينك بص له تشرب حنان
اشرب من الميه النضيفة بتاع زمان
قول للتنابلة يختشوا فاتت سنين
محتاج صيانه للعجل الهمه فين
ثور على الكهنة اللى ناموا فوق كراسي متختخين
واطلب العزوة بشابنا المخلصين
ما تكونش من صنف العبيد
سيدك يقولك انطلق تدهس عيالنا الطيبين
خمسين شهيد
سلمى بتحضن في اختها
وف إيدها كشكول الحساب
حسان أبو أحمد جثته فوق التراب
عن حلمه غاب
في النجع كان غاوي التلاوة بصوت جميل
كان نفسه يطلع مصطفى ابن اسماعيل
صييت في مصر وفي القرى مقرئ جليل
مات حلمه بدري وانتهي
والأب من يومها عليل
***
يا قطر قوللي حكايتك ايه ؟!!
من تاني جايي بجرئتك تنهش شباب
محشور في عربه مضلمه وما ليها باب
والبرد كان قاسي وشديد
مصنوعة من خردة وجريد
خاصمت عجلها وبرّطعت من غير لجام
والحـزن دام !!!
ايه الجـديد؟....عشرين شهيد
من بين شباب أهل الصعيد
متجندين للخدمه في جيش الوطن
آه م العطـن
لمَّا يصيب العقل ويموت الضمير
مشهد خطير
من قبل ما ينادي المؤذن للصلاة
والفجر طالع طلعته هـــــزتنا آه
صرخة شباب بين الضباب
قضبان بتشرب دمهم
ولا مـــن مجيب
يا قطر قوللي حكايتك ايه ؟!!
شيطان بتسرق زرعنا وتعب السنين ؟!!
قولي انت مين ؟
يا شيخ أمين إن كان دا جــــن في ارضنا
هات البخور
ما احنا ف رحاب الدروشة
بدل الصيانة فيه نــــذور
***
يا جـــــــن يا قطر الصعيد
من قبل ما يعــــدِّي النهار
طلَِيت علينا بسحنتك فاتح قبور
فوق مزلقان أرض اللوا
والقتلى كام ؟ !!
تفرق في ايه ؟!!
يا عم ما تردش عليه
ماهو كل يوم حادث جديد
النورس العاشق
وجاني صوتها في الهاتف
حزين النبرة متغيَّر
بيرسم في الخيال صوره
لمركب شوق ومتحيَّر
ما بين البحر والمينا
وشط المينا بينوَّر
ينادي"النورس" العاشق
خلاص ع البر بنقرَّب
***
وقلت آلوه يا نسياني
ورغم الهجر وحشاني
ونبضي شوق وحنية
وعدَّى م الشهور ميـــه
يا ساكنه القلب والنني
خلاص العمر راح مني
كرهت الشك والغيره
ولســه عندي أمنيه
بلاش نفتح على الماضي
شبابيكنا اللي منسيه
تراب الهجر عفرَّها
وساكن فوق ستايرها
*** سمعت الــرد تنهيـده
وصوت بيجاهد الريبه
بيصرخ ... فات آوان اللوم
لا انا ظالم ولا مظلوم
فراقنا لحظـــة ملعونه
ولا فهمنا غًنــا ثومـه:
" ما حدش منا كان أرحم
من التاني
ولا يضحي عن التاني"
كلام صحىَّ مواجعنا
ورحنا في ثبات وشجون
نسينا الهاتف المرهون
على خدودنا
بيشكي الكون
وسال الدمع يتهادي
على الهاتف وبزيادة
***
وانا صامت كطير مدبوح
بيشكي بالجسد ويبوح
يقول يا هاتف إشجينا
وداوي كل ما فينا
ما عدش للبعاد أبعاد
ولا ينفع سهر وسهاد
كرهنا فـُرقة المسافات
ما بين غــُربه وبحر آهات
وعاشت بينا أسطورة
بشوفك في الخيال صورة
انادي بعــزم ما فيَّـا
بحبك صادق النية
وباعشق صوتك الدافي
يا زهرة من بنات النيل
وقايده في اسمك القناديل
تعالي بسرعة دليني
وسيبي الهاتف الصيني
لمين أقـــدر أقول أشعار؟!!
وطعم الحرف فيه صبار
يا اللي انتي اسمك
من حروف اتنـــــين
ولكـــن مشكله
الإسم ميم في أوله
والتاني يـاء متألمه
راجعة من رحلة سراب
والعقل غاب
جايه حدايا تمثلي
لأ ... فكــَّري
دا الشَعر شاب
**
حبك حكاية عشق
من صنع الخيال
أو من خطوط الوهم
فوق بحر الرمال
ودا شيء محال
يدخل غرامك دنيتي
****
ما تقولي فيـــن متعلمه ؟
أبرع فنون الهندسة
واللعب فوق قلب انتشى
في مهرجان العشق
والغش اللـــــــــــذيذ
نضغط عليه
ينزف وفـــا ... ينضح صفا
للحق مش قلبي أناقالوا العفيفة بتشتكي
ظلم الرجال
ومن المحال ... يقدر يحنــَّن قلبها
غير فعل جــــان ...
فوق صدرها بركان عذاب
فارس وغاب ...عن حلمها
مع إنهــــــــا
متكحله بسنين غرام
صَدَق اللي قال :
مخلوقه من ضلع عوج
لو تفرده راح ينكسر
لو تتركــه ... يفضل يميل
ودا مستحيل
شاعر وعايش للوفا
يقبل كــــــده
وعيونه بترتب حروف المعرفة
متأسسه .. مش هلوسه
إسمك عجيب من أوله
ميمه الخبيثة معلقه
على وجه عاكس للذنوب
لازم نتوب عن فعلها
والتاني ياء
رمز ابتـــــلاء
جاي من دمـــوع الغدر
في زمن الحسين
لمَّ انقتل
يوم (كربلاء)
نسيوا الوفاء
****
صَــدَق اللي قـــال :
إش ياخـد الريـح م البلاط
والعمر فـــات
كنت المُكــَـنَّى بالملك
وايام كتيره بالأمــــــــير
وازاي أعيش بعد الملك
أو حتى لو كنت الأمير
آكـــل فـُــــتات
ناس من عــــدم
واشبع نـــــدم
راجعي حسابك فكَّـــري
لازم أكيد بتهذري
حان السكات
الشاعر في سطور
*** الأسم : محمد محمود البهنساوي
*** من مواليد محافظة المنوفية ومقيم في القاهرة منذ طفولته
***المؤهل الدراسي : بكالوريوس كلية التجارة جامعة عين شمس
شعبة المحاسبة والمراجعة
*** تدرج في شغل الوظائف المالية حتى شغل وظيفة رئيس القطاع المالي والإقتصادي (بدرجة وكيل وزارة ) بشركة النيل العامة للطرق الصحراوية إحدي شركات وزارة النقل ثم عمل مستشارا ماليــــا لنفس الشركة بعد بلوغ سن التقاعد.
الحياة الأدبية والثقافية
• رئيس رابطة الزجالين وكتاب الأغاني بجمهورية مصر العربية
• عضو اتحاد كتاب مصر
• محاضر مركزي بقصور الثقافة
• عضو مجلس إدارة جميعة أصدقاء كمال الملاخ للإبداع
• عضو رابطة الأدب الحديث ( جماعة أبوللو)
• عضو مجلس إدارة نادي أدب السلام (سابقا)
• رئيس مجلس إدارة مجلة عبير الزهور ورئيس التحرير
صدر للشاعر :
1. فيروز عينيك ( ديوان شعر بالفصحى)
2. قصائد بطعم الحب ( ديوان شعر بالعامية والفصحى)
3. يا من أنت ملهمتي ( ديوان شعر بالعامية والفصحى)
4. جفون لا تنام ( ديوان شعر بالعامية والفصحى)
5. همس العيون ( ديوان شعر بالعامية والفصحى)
6. وحشتيني ( ديوان شعر بالعامية والفصحى )
7. أحاسيسي ( ديوان شعر بالعامية والفصحى)
8. وكانت لنا أيام ( ديوان شعر بالفصحى)
9. نقوش على جدار القلب ( ديوان شعر بالفصحى)
10خواطر من الفيض الإلهي ( مجموعة أشعار دينية)
• كتب عدة بحوث أدبية في تطور ونشأة الزجل
• له دراسات نقدية في العديد من دوايين الشعر :
1. بحور الرضا للشاعر سليمان خليل
2. صابرة للشاعر خميس عطية
3. مشوار طويل للشاعر خميس عطية
4. نصوص أغاني مصرية للشاعر الكبير / محجوب موسى
5. كتب مقدمات لأكثر من عشرين ديوانا شعريا منها السلسلة الكاملة ( من ملفات المخابرات ا لعامة المصرية ) للشاعر سليمان خليل سليمان
6. الأعمال الملحمية للشاعر / سليمان خليل سليمان
قناة السويس شريان الحياة /قناة السويس الجديدة / أحمد عرابي
مواضيع مماثلة
» موسوعة شعراء العاميه المصريه / محمد الفاتح محمد فؤاد
» موسوعة شعراء العاميه المصريه / محمد الدليل
» موسوعة شعراء العاميه المصريه / محمد خربوش
» موسوعة شعراء العاميه المصريه / محمد عبد القوى حسن
» موسوعة شعراء العاميه المصريه /محمد عطوه
» موسوعة شعراء العاميه المصريه / محمد الدليل
» موسوعة شعراء العاميه المصريه / محمد خربوش
» موسوعة شعراء العاميه المصريه / محمد عبد القوى حسن
» موسوعة شعراء العاميه المصريه /محمد عطوه
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى