موسوعة شعراء العاميه المصريه /مسعود شومان

عارف يااااارب
...........................................................................
عارف يارب
النهارده الأبله فى المدرسه
قالت لى قوم ياولد وقول للفصل شغلة أبوك
وشى بقى أحمر وما عرفتش أرد
ساعتها
لمحت عصفورتين على الشباك
وطرت وياهم
وكنت مستعرب قوى
إزاى عشهم هايساعنى
فوق الشجر سما مش زى اللى نعرفها
والقمر معلقينه ع الفروع
ومونسين نوره بالرفرفه
بيضحكوا مع كل حدوته
وكل ما الحدوته تكمل
العش يوسع والشمس تبعد بعيد
أنا قولت ممكن أقولكم حدوته
الرفرفه خلت إيديا تنمل
أبويا ياولاد الهوا والريح
عطار وشغلته فى المسك والعنبر
واتجوز أمى بإزازة ريحان
لسه مونسه طرحتها
واحنا اتولدنا كلنا ع الفرن
ريحان ومسك ودفا
وفهمنا معنى الرفرفه
كبرنا روحنا المدرسه
وعرفنا معنى الحزن
بس ما فهمناس سؤال الأبله
عارف يارب
أنا نفسى أرجع تانى
للرفرفه
وأقول حكاياتى للعصافير
يارب ينفع
مسعود شومان






رقصه من غير حاجه من غير حد



هيَّا دى النقطه اللى هاارشق فيها سهمى

حااطلع فى الضلمه وافرد ايديَّا

وارقص رقصتى اللى ماحددتش هتكون ازاى

واقول لها انتى رقصتى اللى عرفتك دلوقت

من ريحة عرقى ونهجانى على السلم فى الركن الضلمه

(كان ويايا بنوته ضفايرها طويله طويله )

هالْبِس كسكتتى وامسك عكازى

واشوّح بيه ف وش المسامير اللى واكلها الصدا

(على فكره كان فيه فرخ ورق متعلق على حيطة الفصل

اللى واكلها الملح مرسوم عليه عصافير ميته مدقوقه بمسامير )

دى جزمتى

أيوه

لونها غريب ورباطها بيجرجر فى الأرض

ودا وشى الجبس اللى خلعته العصر

وحطيته على الكرسى المكسور

يمكن يعتر فيه حد ويدِّيه لبتاع الروبابيكيا

ويمكن يعجب الست اللى بتلبس نضاره غميقه

وتحطُّه ويّا تُحفها اللى محافظه عليها من سنة تلاتين

حارقص لأول مره رقصه مجنونه

ملهاش حركات معدوده

رقصه مش محسوبه لحد آخرها

حاارقصها لوحدى

أو للسكرانين فى أى بار مارحتهوش

حارقصها على قد بواقى البيره...

اللى هاتفضل فى آواخر أزايزهم

دى عِمتى اللى وارثها عن جدى

آهيه ف خرَّاره

ودا شنبى اللى بيقولو- الخالق الناطق- خلانى حته من ابويا

هااحلقه جلْط وانعّم حواليه

ودى سبحه قديمه قديمه 33 حبايه

لأ مش 99

حبايه لولى

حبايه ياقوت

حبايه مرجان

دى نصيبى من سحارة ستى بعد ما ماتت

حا ارمى كل حبايه فى بلد

عشان ما يتحرموش من بَرَكاتها

ودى هدومى

حاارقص لأول مره من غير حاجه من غير حد

يمكن تكون عتمه

ويمكن رطوبه

بس هيِّا دى النقطه اللى ها ارشق فيها سهمى



-----------------------------------

حاجات من غير شيش

ــــــ

ساعتها كان ضلك ورا الشبابيك

ومعايا عصفورتين

واحده ريشها عليه دمك

والتانيه من غير ريش

طب إيه فتح جرحى على آخره

وعوِّم المراكب تحت تلِّك

؛00000

العماره رقم 6

وحس ابوكى وهوَّ جاى م الشغل

وانتى فى المطبخ وقطتك "سوسكا"

إيديها بإيديكى فى غسيل المواعين

و"سعيد" لسه بيذاكر فى "ابن عربى"

وهو تحت البطانيه

و"كوثر" لسه بتبعت جوابات

عليها بقع سندويتشات الطعميه

؛000

الواحد حاسس إن الحاجات بتتكركب

وان الكلام متعاد

وان جاهين بيطبطب على ضهرى

وبيقول لى برافو

على خيبة إيه

وحاسس إنى متلخبط

ومش عارف أقول كلام حلو زى زمان

وان الواحد لمّا بيشوف راجل ماشى فى الشارع

أكِنُّه شاف كل رجالة مصر وعيالها ونسوانها...

والَعفْره على وشوشهم

وان مراتى اللى لسه ماتجوزتهاش ماشيه فى جنازه...

فى ايديها منديل أحمر وشايله علم مالوش ولا لون ...

لكن عليه نسرين بياكلو ضفدعه

والناس ورا ميت بتقول لإإله إلاالله

على خيبة إيه !

،...

إذا كنت أنا - إللى هوَّ انا - خسرت فى الطاوله

وحسيت بعديها إنى لازم أخبط لى إزازتين بيره ...

عشان أنسى الشىء اللى بيجرجرنى من ديلى

يوماتى ...

ويمرغنى فى الوحل

وأقابل نفس النخله المقطوعه

ونفس العيل اللى ماشى يزُك

،...

فيه حاجات كدا زى ماهىْ

واقفه لى على جمجمه كبيره وماسكه شرشره

يمكن ابويا باعتها تنتقم منى

لإنى ماطاوعتوش لما قال لى :

روح هات لى دخان قص ولسعنى على قفايا

حتى شوفو

لسه إيديه معلمه بالدم

،...

وانا واقف فى الحاره الوسطانيه ..

اللى بين بيت "أم كامل" و "الحاج عبد الله الطنطاوى "

رابط وسطى بحزام وبطيّر دبابير

،...

الحاجات اللى عرفتها نسيتنى

لإنى دلوقت بقيت عارف بنات ...

طالع لهم بزاز

وبيلبسو جونلات تركواز

وبياكلو " ماكسى " و "جرسى"

وبيحطو رجل على رجل وهمّا قاعدين فى "جروبى "

وانا لسه مش ناسى القشف ...

اللى كانت أمى تقول لى عليه ...

دا يتجرد بسكينه

والبربور اللى نازل على خدى زى الِمدَّه

وكم المريله المسوِّد

والشْرز البنى

،....

الحاجات لسه واقفه

* أبويا بجُوزته

* الورده اللى زرّعت على سُفرة الفستان

* سعيد وابن عربى وحتى ماركس والجابرى ...

وعمى حسين بحرايه اللى لسه بيلم ورق م الشارع

وولاده دلوقت بَقو صُحبات مِلك

وبيتنططو على خلق الله

الحاجات زى مَاهىْ

أو مش زى ماهىْ

وانا لسه بَدور فى القهاوى برجل واحده

من "زهرة البستان" ل "خادم الحرمين"

ياقلبى لاتحزن



--------------------------------


وبتخسر الصباره ضلتها

ـــــــــــ







ع الناصيه

عرّى الحصان البت

واتدلق جسمها طيّر حاجات معرفتهاش

حُمرتها ع الكراس

ورد انقطف

وحجر بيسقط على طروف الدمل

طب ليه يارب بتغسل الصباره ضلتها عشان تفطمنى

فاطنه إزازة عطر فى جيب السديرى

نكله فى حجاب على قلبى

،....

ع الناصيه

تحبل الحدوته بالوساوس

وتكِّسف عضامها من النقى

تفتح شراشيبه لبحر عجوز

ولصوانى عليها كحك

منديلها نَزّاز الصديد يرمينى تحت الجنيات

يدينى صندوق م الدهب

مليان بخور وفلاّيات وإبر وأترها

السوق فى عز الضهر بيكب نسوان

ريحة ايديها صابون

سرّيح بَرُج الدنيا تحت بزازها

يسقط نبى

والشاى يتكب ع الحسبه

أمدد رجلى جوه الشق

فيه حاجات بتندلق

كان منها حبر اسود غطيس

دا اللى فاكره

شنطتى مفتوحه على قلبى

رجلى تفتح فى الحيطان طاقه

يطلع عيال مشاليل بعكاكيز صغيره

كانو ساعتها شايلين شجر محروق

معرفش دلوقت شايلين إيه

أصل ماشوفتوهمش من يناير

شنطتى مقفوله على جسمى

تتمد إيدى

تجيب فلاّيه

كان لونها زى ماتقول كدا

اسود فى لون شعر الغراب

أمدد رجلى جوه الشق

واقعد أسرّح فى شعرى لحد نص الليل .






----------------------------
ولد في 16 – 1 - 1966، في مدينة شبين القناطر - محافظة القليوبية – مصر
تخرج في كلية الحقوق – جامعة عين شمس بتقدير جيد عام 1988
حصل على دبلوم الدراسات العليا في فلسفة الفنون الشعبية عام 1992 من المعهد العالي للفنون الشعبية – أكاديميةالفنون.
حصل على الترتيب الأول في دفعته في المعهد وحصل في الدبلوم على تقدير ممتاز.
دبلوم الدراسات العليا في الأنثروبولوجيا - معهد الدراسات الإفريقية - جامعة القاهرة .
دبلوم التخطيط الاستراتيجى - معهد التخطيط القومى
يعد رسالته للماجستير عن الاتصال الثقافى في مجتمعات الجنوب الشرقى لمصر
عضو اتحاد كتاب مصر
عضو جمعية الأدباء والفنانين أتيليه القاهرة
عضو الأمانة العامة لمؤتمر أدباء مصر في الأقاليم
أمين عام مؤتمر أدباء مصر في دورة عام 2006
الإصــدارات[
الخطاب الشعري في الموال، دراسة تحليلية في نشكيل النماذج الإنسانية، القاهرة، 1994.
أول بروفه (ديوان الفتافيت)، القاهرة، ط 1، 1996.
مربعات ابن عروس (دراسة وتحقيق) دار سما للطبع والنشر، القاهرة، 2000.
بيجرب المشي على رجل واحدة (ديوان شعري)، سلسلة كتابات جديدة، الهيئة المصرية العامة للكتاب، القاهرة، 2002.
أول بروفه (ديوان الفتافيت)، مكتبة الأسرة، الهيئة المصرية العامة للكتاب، ط 2،القاهرة، 2002.
رجلي أتقل من سنة 67، أصوات أدبية، الهيئة العامة لقصور الثقافة، القاهرة، 2003.
الديك الفنان - ديوان شعري للأطفال - سلسلة كتاب قطر الندى - أغسطس 2003.
ذاكرة مؤتمر أدباء مصر في الأقاليم، هيئة قصور الثقافة، ديسمبر، 2003.
ذاكرة النشر الإقليمي ببليوجرافيا إصدارات الأقاليم الثقافية، 2003.
قبل ما يردموا البحيرة على نفقته 2004.طبعة ثانية 2007.
الخلص لبحرك ، دبوان شعرى ، 2007
صاحب مقام ديوان شعري ، نهضة مصر 2008.
ما تقفشى عند بداية الحواديت ، ديوان شعري ، مطبوعات المرسم ، 2011.
بس مين يفهم ، دار الأدهم ، 2012.
مساحات الاتباس والوعى بالنص الشعبي ، هيئة الكتاب 2013.
اكتبوا تحت الضلام بكرة ، دار الأدهم 2014
عدة كتب مشتركة مع آخرين.
كما ساهم بعدد من الكتب في مجال الأعمال الببليوجرافية والدراسات الشعبية منها:
الخطاب الشعري في الموال
مربعات ابن عروس
الموسوعة المصرية لأغنيات الطفل الجزء الأول
الشعر الشعبي
معجم أدباء مصر
ترجم بعض أشعاره المترجم الكبير الأستاذ الدكتور محمد عناني في كتاب بعنوان أصوات غاضبة والذي يدرس في جامعة اركانسو بأمريكا
أعمال أخرى[عدل]
خدنى الغنا وما كنش فيه غيره - ديوان الأغاني
ببليوجرافيا شعر العامية المصرية من 1952 حتى الآن
المؤتلف والمختلف، دراسات في شعر العامية المصرية
معجم الشتائم والسباب واللعان
معجم الأمثال الشعبية - مصنفاً تصنيفاً موضوعياً
الموسوعة المصرية لأغنية الطفل
قبل ما يردموا البحيرة - ديوان شعري
معجم مصطلحات الشعر الشعبي
قمع النفوس من كلام سيدى أحمدابن عروس - تحقيق ودراسة
واحد ثقافة عامة - دراسة في أحوال الثقافة المصرية
مسرحية سوكسيه للكبار
مسرحية التلات ليمونات للأطفال
الأعمال والوظائف[
عمل مصححاً بمجلة اليسار - 1991
عمل باحثاً بأطلس الفولكلور المصري
عمل سكرتيراً لتحرير أول مجلة لشعر العامية (ابن عروس) - 1992
عمل سكرتيراً ثم مديراً لتحرير كتاب الأدباء
عمل سكرتيراً لتحرير مجلة قطر الندى
عمل مديراً لتحرير سلسلة الكتاب التذكاري
عمل مديراً لتحرير سلسلة كتاب الثقافة الجديدة
يعمل – الآن – مديراً لتحرير سلسلة ذاكرة الكتابة
عمل رئيساً لتحرير مجلة الكرمة
عمل مدير تنفيذيا لتحرير جريدة مسرحنا
عمل مديراً للإدارة العامة للثقافة العامة بهيئة قصور الثقافة
كما عمل مديرا للإدارة العامة لأطلس المأثورات الشعبية .
مدير عام فرع ثقافة الجيزة .
رئيس الإدارة المركزية للتدريب وإعداد القادة الثقافيين .
رئيس الإدارة المركزية للدراسات والبحوث ندبا .
المشـاركـات
شارك في معظم المؤتمرات الأدبية في أقاليم مصر بداية من 1988
كان عضواً في الأمانة العامة لمؤتمر أدباء مصر في الأقاليم لسبع دورات
شارك في مهرجان المربد بالعراق - على نفقته - 2000
شارك بأبحاثه في عدد كبير من المؤتمرات، من هذه الأبحاث:
المؤتلف والمختلف، قراءات في شعر العامية المصرية - شعراء البحيرة – الدقهلية – أسوان – الإسماعيلية – بورسعيد – السويس، وغيرها.
آليات استدعاء التراث الشعبي في شعر سمير عبد الباقي
النص الشعري الشعبي في منطقة القناة، وحس المقاومة - بالاشتراك مع قاسم مسعد عليوة
صورة البنت في التراث والمأثور الشعبي
قصيدة النثر العامية بين إشكالية المصطلح واكتشاف جماليات جديدة، دراسة تتناول الشعراء - مجدي الجابري – يسري حسان – جاسر جمال الدين – صادق شرشر
الوحدات الزخرفية في فن المرسمات الشعبية
نداءات الباعة، دراسة إثنوجرافية
الثقافة الشعبية والإعلام، البرامج الإذاعية والتلفزيونية نموذجاً
بيرم التونسي والإبداع الشعبي، دراسة في التناص
النشر الإقليمي، الطموحات، الإنجازات، السلبيات
توظيف عناصر الثقافة الشعبية في شعر فؤاد حداد
أنا شعرى منى وابن ناس فقرا، قراءة في شعر الأبنودى
رباعيات الشاعر الراحل حامد البلاسى
تداخل النصوص في العروض الحركية
شاعر الربابة بين فنون الدراما والشعر
آلات النفخ المصنوعة من الأب بين فن الصناعة وفنون الآداء
لغة الشارع المصري من السرية إلى لغة الروشنة
نشر قصائده ومقالاته وأبحاثه في عدد كبير من المجلات المصرية والعربية، منها: الثقافة الجديدة – أدب ونقد – أخبار الأدب – إضاءة – القاهرة – الرافعي – الكرمة – المساء – حريتي – الرياض السعودية – الأنباء الكويتية – الفنون الشعبية – الكتابة الأخرى – الجراد، وغيرها
الأعمال الدرامية[عدل]
كتب مسعود شومان أشعار عدد من المسلسلات والأفلام، منها:
مسلسل حضرة المحترم رواية الكاتب الكبير نجيب محفوظ
مسلسل دموع الغضب - سيناريو وحوار فيصل ندا
فيلم ونس غريب - فيلم روائي قصير
كما كتب أشعار عدد من المسرحيات، منها:
الحامي والحرامي
عزيزة ويونس
ملاعيب أبو نضارة
بالعربي الفصيح
عريس لبنت السلطان
مولد سيدى طناش
المشخصاتيه
درب عسكر
آخر الفرسان
كابوس للبيع
من أشعاره[عدل]
1
طار العصفور من ع التوته
شاورت بعيونها البنوته
عصفورى يابو دم خفيف
كانت بنتوتك تستناك في الشموسه
بتحنى إيديها بعرق الشمس وتتهجاك
بتغنى لغاك
مرجعتش ليه
ولفت على الأحزان ولا
بنوتك بتنقى الغله
وبتغزل توبها من الضله
وتلم القش
طاير على فين
بتزرع وجعك ع الشطين
فين رفرفتك وغناك يا ملاك
أنا منتظراك
تحت الشجرايه.. في آخر الكون
تجت الشباك
عند القله
سقعها الهوا وانا بستناك
مرجعتش ليه
رجع العصفور غرقان في الحزن
في طبق بنور شايلاه غربان
والدنيا تشجر في الأحزان
والبنوته لسه تشاور
وتنادى لعصفورها الطاير
مرجعتش ليه
أنا منتظراك
تحت الشجرايه.. في آخر الكون
تجت الشباك
عند القله
سقعها الهوا وانا بستناك