موسوعة شعراء العاميه المصريه / هناء جوده

[url=][/url]

الاسم .هناء عبد الجواد عبد الجواد جوده
اسم الشهرة : هناء جوده
الصفة : كاتب

تاريخ الميلاد 28/9/1963
الرقم القومى 26309281602101
بطينة – مركز المحلة الكبرى – محافظة الغربية
المؤهل الدراسى ب.تجارة
المهنة او الوظيفة : رئيس قسم بالتربية و التعليم
البريد الالكترونى women_rail2000@yahoo.com
https://www.facebook.com/profile.php?id=100000451821147
عضو اتحاد كتاب مصر
عضو نادى القصة
عضو نادى القصة باسيوط
عضو نادى الادب بقصر ثقافة المحلة
اصدارات ( معزوفة الانتصار – جدارية حزن – كيد ساحر – عزف الروح – وجوه تشبهنى – مخاض ) مجموعات قصصية
( عُكاز الصبر – كيميا الحروف – نَخب الحياة ) شعر بالعامية المصرية
( فوازير الصنعة تحكم ..... استعراضات شعرية )
تحت الطبع (سنابل التوحيد (شعر) – موال الحنين (رواية )




مين يهوذا ؟
..............
ف انكسار الحر نسمه
ف انشطار النسمه نوّه
ف انتصار النوّه ريح
كل شئ ما بقاش مُريح
القتيل كان قصدُه يقتل
قبل ما يصبح دبيح
واللي نام على ضهر دمُّه
ساب وراه مليون جريح
كل شئ ما بقاش مُريح
والحياه ف الحسبه غابه
والبشر حبّة تعالب
والأفاعي والديابه
كُلُّه بقناع الأرانب
كُلّه جامع طرح كُلُّه
جوّه قلب الحسبه ضارب
كل شئ ف القسمه قابل
حتى لو ح يكون بسالب
هاتوا مغلوب جنب غالب
مين يهوذا ومين مسيح ؟
كل شئ ما بقاش مُريح
إنما للصفر حاله
فيها كل الإختلاف
يرفع الأرقام ف لحظه
حتى لو كانت عجاف
إنما ف الأصل هوّ
رمز معنى الإلتفاف
شئ مالوش ف الأصل قيمه
بس قادر يبقى مطره
نازله من بطن الجفاف
يروي بنك الصحرا خُضره
م الورق أبو مدنه خضره
والفقير يا ألف حسره
نام ف بطنه اللقمه حاف
تحت سقف من الصفيح
كل شئ ما بقاش مُريح
الفقير جوّه المغاره
بس عايش بالكرامه
من عصور فن الحجاره
عمره لحظه ما يحني هامه
والزعامه
والإمامه
برّه حد القسمه دايما
دول عشان يتوجدوا حتماً
محتاجين واحد صحيح
كل شئ ما بقاش مُريح
..................................
مطلوب تصريح
..................
الحلم عجوز ...
بقى أضعف من إنُّه يعافر
ويغازل طيف البنّوته
اللي بتتمرجح ف الغيمه
ولا حتى يدندن ترنيمه
تسمعها النجمه السهرانه
الحلم اتحوّل أرض بوار
هجمتها جيوش الخرسانه
ف اتعبّى تراب
واتكعبل ف خياله النايم
ع الأرض سراب
ما بقاش للحلم جناين فُل
ولا شجره تحاجي عليه بالضل
الحلم صبح ف الطل طريد
والشمس بتلفح فيه وتذل
الحلم اختل
بقى ماشي بيتطوّح ف الريح
مطلوب تصريح ...
للحلم عشان يرجع عيّل
ويعيد الكرّه من الأول
ربما كان له ف الدنيا نصيب
ما يقعش ف أخطاء الماضي
الحلم ما هوش كائن عادي
بيعيش ويموت م الحُزن كمد
ولا عمره يكون للعرض فقط
طول عمره بيشبه شمس نهار
لو غاب ف بلد .. يظهر ف بلد
كان عنده عزيمة روح وجلد
إنما دلوقتي الحلم عجوز
مش حمل سفر
ولا قادر واحده على الترحال
مطلوب تصريح ...
للحلم عشان يرجع عيّل
ويخُش ف نغمات الموّال
وان صَعَب الحال
الحلم ح يمشي طريق تاني
إنما محتاج برضه لتصريح
لكن ح يكون ...
تصريح بالموت
.............................
 
عشان أقدر أغنيلك
........................
أنا المزروعه ف ترابك
كما النخله اللي ف الصحرا
أصاحب ألف نبتة شوك
وباشحت م السما المطره
ورغم الحر والعَفَره
بوزّع تمر ع المارين
أنا المرميه بين أمرين
مابين شمس وهواكي النار
وبين دمعة نبات صبّار
ولمّا ادعي عليكي ف يوم
تسابق روحي باستغفار
أنا الجنّه اللي دخلت نار
على إيدك بدون أسباب
أنا الحاضره بدون تأخير
ودايما تكتبيني غياب
وانا المقفول عليّا الباب
بدون لقمه ..
بدون ميّه
برغم فردتلك قلبي
على نيلك معديّه
أنا الواقعه ف تسميّه
ماهيش ماشيه مع حالي
ولا ماشيه مع الصوره
هناء ازاي وانا فيكي
بطول العمر مكسوره
براحك خير ومتوزّع
وانا ف الهم محشوره
وطول العمر مجبوره
على حُبّك
م انا بنتك ..
وانا الحافظه كتاب الله
وانا المأموره أدعيلك
وانا الصايمه ف نهارك جوع
وانا القايمه ساعات ليلك
أخدتي العمر من عمري
أخدتي الدق من قلبي
أخدتي الشكل من وشّي
لكن يا مصر معلشي
عشان أقدر أغنيلك
ياريت ..
تسيبيلي نُص لسان
...................................
هناء جــوده
من ديوان مين يهوذا الصادر  عن دار الاسلام بالمنصورة  2016



كل القصايد بور
..................
برغم الشِعر جوّايا
بيشبه نهر ف الفيضان
ما بيجفّش
تخاف رمشك معاه يرمش
تفوتك صوره أو شطره
ورغم انّي ف هواك شاطره
مافيش مرّه حاولت اكتب
قصيده عليك
عشان مش لاقيه ف الأشعار
ولا صوره توازي عينيك
ورغم إيماني بغرامنا
بالاقيني على الأوراق
بقيت ياحبيبي باكفر بيك
عشان باعجز عن التصوير
وباعجز أوصفك كلمات
بقيت زي اللي مش طايل
يجيب تفاحه م الشجره
وهوّ جعان
رماها بعكس مافيها
وسابها وفات
أو العطشان وما شربشي
عشان شاف انعكاس صورته
على الميّه ف نهر زلال
ف قال الميه مسمومه
عشان مايهزش الصوره
فضل عطشان لحد مامات
ف نبتت زهرة النرجس
حكايه جديده ف الأساطير
يجوز مش قادره ع التعبير
ولا قادره ....
على وصف انهمار الشوق
كما الفيضان
أنا إنسانه أرضيه
ما يقدر يوصف الجنّه
سوى رضوان
ورغم الشعر جوايا
ف وقت ما ينطلق يبقى
فصيح رهوان
معاك يمشي الطريق يعرج
ويصبح فجأه نُص لسان
يجوز مش قادره ع التعبير
عشان كل القصايد بور
قُصاد وصفك
.............
هناء جوده




ميلاد الموت
..............
ما عادش الموت يخوّفني
من الوِحده
م انا فيكم باعيش وِحده
ورقصه الدنيا ع الواحده
قصاد عيني بدون معازيم
بدون كوشه
بدون زفّه
ولفيت ف الحياه لفّه
لقيتني ف أخر المشوار
على الأسفلت باتدفّى
ببرد رصيف
فِ لمّتكم لقيت تخاريف
وصوره معادله لحكايه
بطلها الزيف
لا إيد تسند ف ضعف ضعيف
ولا قِصّه بدون تحريف
ما شوفتش غير عيون بصّه
بتخطف م المتاح تخاطيف
وكنتوا يادوب سحابة صيف
بلا فايده
بلا لازمه
ولمّا شعرتوا بالأزمه
عشان الصوره ما تبانشي
قصاد الخلق مهزوزه
ولمّا لقيتوا رجليكم
بقت بالغصب مغروزه
على عينكم جمعتوا فتات
عشان أسوأ كفن ينشال
على عينكم جمعتوا فتات
يادوب أجره لكام شيّال
يشيلوا النعش وقت الموت
ح اقولهالكم بعلو الصوت
مانيش عايزه كفن ولا نعش
ولا عايزاكوا قُدّامي
وطلق مماتي لو حامي
ح اعطّل نفسي لو ساعه
لحد ما اكون هنا وحدي
وأجيب الأجره من عندي
وتمن الشاش
وتمن النعش
واقوم اتوضّا وأتجهّز
وأتبرفن
وييجي الموت على مهلُه
كأنُّه عريس بيستأذن
يشوفني عروسه ف الزفّه
وباتدفّى ..
بميلاد الموت
........................
هناء جــوده