موسوعة شعراء العاميه المصريه / ايمان مصطفى

قوَافيّا
وأبْنِي من حُروفي بيوت
وبلْقَاهَا.. وتلقَاني.. بجدرانها
قصايد دامَعه وخدانى
أشكّلْ طُوبْهَا منْ صبري
أطَبطَبهَا تطَبطَبلِي..
بِذِكْرَى تَايَهه مِنْ أمسِي
مَانَا نفسي ...أكونْ ضحكَة
ولو شافنِي فى يُوم فَرْحي
يبكيني.. ويتألّم منِ الحُرقة
أقول تاني ؟
أصورْ للمَعاني بيوتْ
منِ اللولي ..ومَهْمَا قالُولي ..
لا عُمري فى يُومْ أندم ..ولا أحزن
وهَاوْزِنْ لما أجيبْ للقلَبْ
وتر غَالي من الإحساس
وتاج عَ الراسْ
واطَعمْ حَرفي منْ رُوحه
بحَباتي
وأعمل م العسل رُطَبِي
تنادِينى
قوَافيّا تبكّينِي ..أبكّيهَا
تخليِني ..أخلّيهَا.. ترفرفْ شايله
أحلامَي
تغنّي لَحْن أيَامي ..تسلّمني
تكلّمني ... دا صُوتهَا عَزف أنغَامي
قوَافيّا
ايمان مصطفى



---------------------------


صداع نفسى
وطول عمرى
وانا واقف على شط الامل وحدى
مراكب ود مليانه
ومش لاقى مكان قدى
وعاصفة ريح أسى مُره
بتجرحنى وبتعدى
وترجع تانى ..تتشفى
وتسبح جوه موج عينى
تلاقينى
رزاز تايه ..ومتبعتر
على شط الحنان يمكن
يلاقينى..شراع ودى
ينادينى.. يرد الروح ...ينسينى
سنين تغزل خيوط حرمان
على جبينى
وشقت بحر.. م النسيان
دموع عينى
وكان ياماكان
فى حدوتة أمل حلوة
صغنتوته
وكبرت قبل اى اوان مايلحقها
ويعرف ياترى كانت
جميله ولا ملتوته
عظيمة ولا زى كتير
فى دنيتنا بلا عنوان
ولا تفصيل
وتشبه فى الفروع توته
بلا اوراق
لابتضلل ولا تملك.. أمل للدود
ستار ممدود ..ملوش أخر
بيتاخر بعيد.. وبعيد
ياحظ عنيد
ومش نافع معاه تهديد
مفيش حيله
ياعافيه ضعيفه وقليله
وكسرانا ..محصرانا..
مفيش منك.. فرار ليله
قليل البخت بيلاقى
فى وسط الفرح تعليله
ويعمل ايه ؟
هايستنى أمل يمكن يرد عليه


------------------------------------



سكرات الحياة
مابين التوهه والفوقه
تعيش سكرات
تحس حاجات بتندهلك
وجوه الصمت
تلقى حاجات
عيون بالدمع مخنوقه
رموش وقفالها ما تعدى
وقلبى بالألم يدى
وروح تحلف ما هاتسلَم
ولا تكلَم صدى صوتها الى بيعلٌم
على جدران شعاع شارد
وفيه مارد بيندهلى
بصمت عجيب
وأمرى غريب
كلامه يهز أوصالى
بيرعبنى
بيقتلنى
يصم اذان ماهيش سامعه
وانا بدمعه توارينى
فى حضن سماها تخفينى
مفيش فايده
وأنا دايب ف صمت مريب
وألقانى شعاع مسحور
.فى وقت أقل من ثانيه
لقيتنى بدور
وقلبى بنبضه دا يشرَق
ويرجع تانى ويغرّب
ويسألنى أنا المحظور
ومين يسمع
ومين يفهم
وحالى ..بدّلوا حالى
مراكبى وسط دوامه
بتسحبنى بأوحالى
ومش عارف أنا راجع
وبلقانى فى ترحالى
بعينى التانيه ألمحها
جميله تبارك الخلاق
بتسقينى عسل حراق
وشهد مراره يقتلنى
أكلمها تكلمنى
أغازلها تتوه منى..
أحلَفها تحبينى
تقولّى فراق
فراق بفراق
دا من إيدك شربت المر
وحليته ف كاسات الذل
وفى الآخر.. تقولى فراق
فراق بفراق
هكسرلك كرستالك
وأكشف كل افعالك
وأطهر قلبى من طينك
واخيّب كل أمالك
أخليكى بدون ذكرى
غريبه عايشه مش فاكره
يا وهم يا دنيا يا ناكره
فى وسط التوهه لبسانى
سمعت الصوت بيهمسلى .
أنا الفوقه انا الفوقه
هاتشهق شهقه تلقانى
أنا دنيا ..ماانا عارف
بعيد عنك هاعيش فيكى
خلاص من قلبى هارميكى ..
.بعينى شفت بلاويكى
وأنا القادر أخليكِ
تعيشى لىّ من تانى
و بعد التوهه والفوقه
ومن بعد الشقا روقه
وحالى طمنوا حالى
&

-----------------------------------






الاسم ايمان مصطفى
طالبه فى كلية اداب جامعة المنصوره قسم لغه عربيه
عضو صالون النهار
عضو نادى ادب طلخا
هضو مؤسس بالمجلس المصرى للشعر العامى
عضو جمعية مبدعى مصر