موسوعة شعراء العاميه المصريه / امال بسيونى

ذكرياااااات
بناء على طلب حد حببتي قوي
..................

قبقاب خشب
البنت شبر
زعروره طول عقلة صباع
وصله يادوب حد الكتاف
جلابيه بيكه بنص كم
كات نص كم ....
مع نص دسته من العيال
مقرفصين تحت السرير
والحظ كان شاحح قليل
( ناس تعبانين... لاء عدمانين )
قلب البنيه لسه بكر
سمارها في غاية الهدوء
الشعر ليل رافض شروق
وعيونها نيل
تروي العطاشى سلسبيل
تحلم بيوم يجي الأمير فوق الحصان
ولا كنش فيه أبدا أمير
دست براءة حلمها جوة البرام
ومطرحة آمالها خبزت عيشها صبر
فتحت فطير لجل الأمل يبقى له عمر
لمت حاميه وولعت فرن الحياة
يمكن يسوي القهر يطلع منه فجر
البنت كات حلوة اللسان
البنت شايله في حضنها ريحة الأمان
فاتت سنين
لكن الزمان عمره ما صان
حلم الغلابه الطيبين المطحونين
باعوا الصبيه بمليمين للجاحدين
طحنوها زي الغله في وابور الطحين
صبحت دقيق
راح يعجنوه
وح يخبزوة في فرن البنادر الضياع
الحلم ضاع
البنت كانت كل يوم تكبر سنين
بعد ما كات عقلة صباع
صبحت مدينه مهشمه شكل وبيوت
إتربطت أحلامها بخيوط عنكبوت
من فين تفوت



----------------------



شال الحمام ... حط الحمام
كان الحمام مسكين يتيم
في جناحه كسر بيألمه
مات اللي كان معلمه وبيعلمه
دلوقتي كسره حجمه يطير لفوووق زي النسور
والعتمه غمت له عنيه رافضه الصباح
أصل الحمام قلبه إنجرح لما إنكسر منه الجناح
واتحكموا الناس الملاح
الريش خدوه واستعملوه وده كان في قانونهم مباح
بس الغريبه بيسألوه ...
راح فين أبوه ... فين عزوته ... فين قوته ...
ومين ح يرضى يقوته لما يقع
فيه اللي قالوا نعدموه ...أو شغلوه هنا عندكم (يمرمطوه)
أو إبعدوه عن حييكم
ولإنه كان مسكين ... ضعيف
فيه حد قال خلاص ... سيبوه دامعدش منه أي خوف !!
لو حتى بالطوب حدفوه
ولا في إسمه حرفوه ... وده كان مخيف
نام الحمام في الخط هووووووووه

----------------------------



بتخوفيني منك....ليه
بترمي ياما كلام
فاهماكي .. ده لإنك
بتحاولي تداري....
لكن القدر غلاب
بيفضحك عندك...
وصريخك الكداب
يا معشقه الآهات..
ومضفره وجعي
ورده بينا باب
وتتحمي بمدامعي
بتوضا برضاكي
لكني عارفاكي ...
إن الصلاة على الزين
وإن إنتي قلب حزين ...
كما قلبي في وحدته
إللي كتير سكته عن ...
عن إنه يندهلك
سابك على مهلك
تقرري التاني
الأولى كات ليه
والتانيه على عيني
سبتك يا بلطيه ...
يا ساكنه تكويني
والبعد طال ياما
والنفس لوامه
والورد كله خلاص
مفيش ورق فاضل
و الصبر جوة الكاس
مبقاش خلاص قادر ....






آمال بسيوني أحمد .... شاعرة عاميه
وتكتب بعض الومضات الفصحى
عملت بالصحافه المصريه
عملت بمركز الخدمات القانونيه بكلية الحقوق
عملت وكالة دعايه واعلان بالأسكندريه تم نشر كتب علميه وشعريه
حصلت على العديد من الجوائز وشهادات التقدير
لها أغاني بإذاعة مونت كارلو
معتمده إذاعة وتلفزيون الأسكندريه
سجلت العديد من اللقاءات التلفزيونيه
نشر لها كثيرا من اعمالها بالجرائد والمجلات
لها ديوان آمال في الهوى من أدباء الشعب
لها ديوان بحبك يا بحر من الصديقان (حسام عبد القادر ومنير عتيبه )
كانت عضو أدباء الشعب....والأدب العربي ... وجمعيه المعاشات
ونادي أدب قصر ثقافة الحريه
تشارك في الكثير من الندوات بالأسكندريه والمحافظات
ضمن ال100 من شعراء العصر الحديث
لها أغاني كثيره بالسوق الغنائي