موسوعة شعراء العاميه المصريه /احمد السندباد

وخد عندك
مع أنه مايعرفكيش
ولا عمره سمع عنك
لقيت البحر يسألنى
وفين هى ؟
قدرت أزاى تفارقها ؟
فقلت أنا مين ؟
فقال لى بلاش تلاوعينى
كتير زيك هنا عاشقين ملازمنى
أقولِك سر م الاخر
أنا من أيه ؟
وأيه سرى وتكوينى ؟
فى ساعة الجذر أكون دمعة
ساعات برضه أكون المد
وأكون أغنية للعشاق
كتير أخبار
كتير أسرار
وخد عندك
ده واحد جاى م العمرة بقى له يومين
كتير أحباب بيتلاقوا
فى لحظة شوق بيتعاهدوا
لآخر العمر ما يفارقوش لبعضيهم
وناس حلوة بتتواعد
وناس بتفارق الدنيا
وناس تقتل ف بعضيها
عشان قرشين
دموعكم جوه فى عنيا بتوجعنى
ولما تلاغى محبوبتك
مافيش مرة تجيب سيرتى
مابتقوليش ولا حاجة على موجى
على خيرى اللى متوزع على الدنيا
تقول يا حبيبتى
لون الليل ده لون شعرك
وشمس الدنيا فى جبينك
عيونك زى نور البدر
وأهدابهم دى مرسومة
بكحل وجاى من بابل
وأما الغصن غصن اّلبان
وأنا حلقى خلاص مرر
ياريت تبعت لمحبوبتك عشان تيجى
وتركب جنبها قارب
وأهدهدها على موجى
تمد أيديك على جبينها
تنام دوغرى
تمد شفايفك الخمرى
عشان تصحى
وتشرب شهد متصفى
عبير روحك بيأسرها
أيديك ع الخصر بتضمه
تلاقى الفرح يملى الكون
ومتخافشى وتتلفت
ولا واحد هنا شايفك
وسرك راح يكون فى البير ومتخفى
ولسة برضه بتدور على عيونها
ده أنا زهقان خلاص منك
لو أنتَ خلاص مفارقها
راح أبعت موجى يندها
تونسنى فى عز الليل
31/1/2012

-----------------------------------


أصداف البحر
أصداف البحر المرمية
حوالين الشط
كان عندى ميعاد
مع حلم هناك
وعشان مشتاق
أنا بركب آخر عربية
ف عز البرد
ف نص الليل
ومعايا دليل
أتنين عاشقين
وبطرف عينيا من الشباك
ألمح عواميد النور ترجع للخلف
والقلب الطيب مستنى لحد الفجر
ويمد أيدين مشحونة حنان
كان قلبه يساع الكل
أصداف البحر
الليل يتاوب
علشان الشمس ما تطلع
تضحك للشجر الطالع وسط الرمل
وتهب النسمة
ترقص عود الورد وكأنه بيرحب بينا
ويخش فى صدرى عطر ريحان
أصداف البحر بلون الورد
أصداف البحر بلون الود
أصداف البحر فى عز البرد
بتدفى القلب بأحلى عبير
أصداف البحر
عمالة بتحكى ف الحواديت
مرة لحكاية جنيهّ
راميه شعورها
على كتف الشمس
ألوان الطيف
بتشاغل فى عيون محبوبها
و موجة شقية
بتهد بيوت طفل بناها
علشان ما هو عاشق محبوبته
ويتوه فى عيونها
ف عز الليل
و الصبح يشوفها
بلون العشب المسقى دموع
وعيون سرحانة
فى بكرة الجاى
وحبيب بيغير
أوراق بتطير
ونجوم بتدور
فى السما من فوق
فى البحر تعوم وحمام بيزوم
عاشق بيشب
ويمد كفوفه يطول قمره
ويقول فى عيونها أحلى كلام
وتقوله حقيقى كلامك جد
أنا أجمل حد ؟
تلمع فى عنيه وتنادى عليه
ويغمض علشان ما يشوفها
تسقط منه فى قلب البحر
وبيحكى لها عن أسراره وحلم الغد
نخلة بتطرح عز البرد
زهرة تفتح وسط الشرد
صحبة تشاركه فى الزواد
ورغيف متكسر ميت حته
كان جوه الكيس بتمد أديها النونو
تقطم فى اللقمة كما العصافير
خايفة ما يكفيش
مع أن الرزق يكفى الكل
وكمان بيفيض
والرب بيرزق حتى الطير
فى سماه
لكن جواها الطبع ملاك
والباقى فى رف التلاجة
بتشيله هناك
علشان يلقاه شاعر مهموم
وبيفطر بيه
وحياته فراق
وشعور مشتاق
أسرار أشكال ألوان
البحر بيرسم فوق منها
صورة العدرا
وحاضنة مسيح
فستانها فسيح
كما ريش الحور
وعيونها تسبح للمولى
أصداف البحر
صورة جامع وعليه مدنة
مكسية خضار
صورة لملاك والتانية لجان
كسر بأديه أعشاب البحر
أصداف البحر ساكنها تاريخ
أشكال الصدف المرسومة
فى وشوش الخلق
راجل شقيان
بيدور على رزق ولاده
فى حجارة وطوب
يحسبها كتير
يتعب وينام
والحسبة بتطلع بالمقلوب
أصداف البحر
والبابا نويل
الضحكة معاه تطلع م القلب
بيبص لآخر موج البحر
واهب كل حياته
لناس ولناس
ناس يعرفها
ناس ما عرفهاش
كان حابب حد
يحب لحد
والشعر الأبيض بيزينه
عمال بيوزع فى هدايا
على خلق الله
أصداف البحر
بتبوس فى ضفاير شمس غروب
علشان تغسلها فى المية
مع هّم اليوم
فنان بالكاميرا بيصور
وواخدنا طابور
مرة بيصور مجموعة
مرات بالدور
وياخدها كلوز
ويغنى ساعات
ولا مرة شفته بيضرب بوز
يسهر للصبح ينادى الشمس
عشان تطلع
مع رزق اليوم
يحاكيها ويضحك من قلبه
كما طفل عجوز
أصداف الشط
أطباق الفاكهة المرصوصة
فوق ترابيزة والرزق كتير
بتنادى بحب
نتسابق حوالين مرجيحة
ألوانها الزرقة بلون البحر
نركب بالدور
وساعات بالجوز
أصداف البحر
حوالين الشط
ويمامة تعدى فى طيف شاعر
يبكى الأشواق
مستنى عشان رنة هتحييه
أو حتى تكون بتأنب فيه
علشان أتأخر فى رسالة
و العشق الساكن مستنيه
وكأنه سابيه
بيقول دى حبيبتى فى كل الكون
الأصل وبس ماليها مثيل
أصداف البحر
ومراكبى بيطرح فى شباكه
ويلملم رزق أشكال ألوان
فى الشبكة حاجات
حبه ألعاب
كام علبة كانز
وجراب نضارة قديم
على نفس الشط
الأم بتحضن ف ولدها
كان جوه حشاها بيتشاقى
مستنى عشان يخرج للنور
وأبوه محتار
على أسم الواد أو أسم البنت
وبيشرب شاى مخلوط بريحان
ويعود علشان رزق المولود
بتقوله معاك العمر هعيش
يوعدها بأنه يعود للشط
وتلاقى نفسك تبكى وحيد
رجلك بتدب فى قلب الرمل
كان قاصدك تدفن عشق قديم
أو تفتح طاقة لعشق جديد
قاعد مستنى لمحبوبتك
تسألها سؤال
لساه العشق
بيصرخ آااااااه
وحصان الشعر معاك بيون
والجرس المخنوق فى رقبته
كان نازل رن
كما نحلة بتسكن فى خلية
يعسوبها يزن
وبيجرى وراها يحصلها
م النشوة تأن
تسمعها هناك
أصداف البحر
11/12/2011


---------------------------------


مش زيهم
مابتشبهيش كل النسا
ولا الملايكة ولا البشر
لمعان عيونِك العسل
زى النجوم
واللمسة من إيدِك سلام
تشفى الهموم
ونور جبينِك
زى القمر ليلة اكتمال
والإحتمال الشمس ترفض للطلوع !
وبضيِك أنتى تكتفى !!
كل النسا تصبح عبيدِك
يقفوا صفوف
علشان ما بيكى يحتفوا
شوفت السحاب
نزل مطر
علشان يخضر جنتِك
آه م العيون
مين قدها ؟
عيون بتشبه للمها
ما بين أيديكى بعود جنين
بتعلميه معنى الحياة
وبتسندِيه
علشان ما يبدأ بالخُطى
وعليكى أغير
عّرق عبير كأنه برفن عالمى
ريحة أنوثة ساحرة
باهرة
مسكرة
أما السنان تلمع
كما ضى السيوف
وبتوه أنا فى طعم الكريز
م الشفة أنا فى عرض النبى
والأهرامات تحت الكتاف
منهم بخاف
أصعد ولا أنويش الرجوع
جمالِك أنتى مالوش حدود
والفاكهة اللى ع الخدود
تفاح ومانجة مع عنب
ازاى أنا أشعر بجوع
حُضنِك دفا
حُضنِك شفا
أخدت منه جرعتى تشفى الوجع
بس أأمرى أنا ليكى طوع
أقعد فى محرابِك أنا
علشان أغنى لحضرتِك
وأجيب زهور
يتحطوا جنب مخدتك
بس أحضنهم بالأوى
عشان أنا بعمل كدا
ومتبعدِيش
أنا فى عرض السيدة
ويا الحسين
سايق عليكى الأولياء
دارِى جمالِك م الحسد
يا اللى ما فيش زيك نسا
أربع حروف أسمِك
ده مرسوم ع النجوم
كل الطيور بتردده

---------------------------------------------------------



عاشق النيل والقلم
ـ حصل على المركز الثانى لأحسن ديوان عامية لعام  2007
فى مسابقة ( جمعية الأُدباء ) عن ديوان خطوط كفك 0
ـ نُشرت أعماله ببعض الجرائد والمجلات مثل : النبأ ـ الأنباء الدولية ـ أنباء اليوم ـ حواديت ـ العمال ـ المسائية ـ الوعد ـ الجيل ـ نهضة مصر ـ النهار  ـ المساء ـ الأهرام ـ الوفد 0
ـ صدر  له ( 7 ) دواوين ( خطوط كفك ـ قولى لى مين ـ الحلم احتار  ـ زهور الحب ـ زنزانة ورق ـ شراغيش ــ  التنورة  )
ـ تحت الطبع بمشيئة الله عدة دواوين منها (ـ تلقيمة سكر ـ مش زيهم ـ الساحرة ) شعر  ـ اغتيال ايزيس مسرحية ـ مصر فوق السطوح أوبريت ) 0
ـ مُحاضر مركزى 0
ـ عضو اتحاد الكُتاب
ـ مستشار أدبى بالمركز العربى للإعلام 0
حصل الشاعر على عدة دروع وميداليات وأوسمة منها : ـ
ـ درع اتحاد طلاب جامعة القاهرة أ
ـ درع من كلية الحقوق جامعة القاهرة شعبة ج
ـ درع قناة العربية سباق الهجن نويبع لسنة 2012
ـ وسام نادى أدب المنيرة 0
ـ ميدالية من محافظ الفيوم والهيئة العامة لتنشيط  السياحة
كما عمل رئيس نادى أدب المنيرة الغربية من عام 2011 حتى 2013
ـ حصل على المركز الأول فى النشر الاقليمى لعام 2013 بديوان شراغيش 0
ــ  عضو الأمانة العامة للمؤتمر الخامس للقصة الشاعرة مايو 2014
ــ  عضو لجنة العامية باتحاد الكتاب من عام 2011
ــ  عضو صالون الشروق
ــ  عضو لجنة العامية بمؤسسة الحسينى الثقافية
ــ  من ضمن أشهر مائة شاعر عامية فى مصر فى العصر الحديث طبقاً لتصريح وكالة أنباء الأدب العربى