موسوعة شعراء العاميه المصريه / ابراهيم خليل ابراهيم

يا بن بلدى ...
شعر : إبراهيم خليل إبراهيم
صون بلادك
أوعى مرة تبيع ضميرك
خلى يوم وعدك سلاحك
يجرى ويجيلك نجاحك
والبشر يشهد بدورك
خلى توب الصبر حصنك
والفضيلة فـ حكمتك
يعلى ويا العدل أسمك
لما تُصدق كلمتك
خلى باب الصبر بابك
وأنت عيش صاحى الضمير
تلقى كل الناس صحابك
تحصد الخير الكتير
يا بن بلدى ...
صون بلادك
أوعى مرة تبيع ضميرك


------------------------------

يا صاحبى
شعر : إبراهيم خليل إبراهيم
يا حاسس بأحوالى
يا نبض الروح فى موالى
احترت أنا فيك
وازى أراضيك ؟
وانا باقى عليك
أنت يا غالى
يا صاحبى ....
يا رفيق كفاح عالى
تعالى أفكّرك تانى ...
اللقمة زمان .... قسمناها
والفرحة كمان .... حضنّاها
والدمعة اللى على خدودنا ...
بإيد واحدة مسحناها
والغربة اللى على جبينّا
فى حب بلدنا خُضناها
وكلمة مصر فـ ضلوعنا
ما جينا فـ يوم نسيناها
وكلمة مصر فـي قلوبنا
فى عز الشدة صُناها