موسوعة شعراء العاميه المصريه / محمد الفاتح محمد فؤاد
صفحة 1 من اصل 1
موسوعة شعراء العاميه المصريه / محمد الفاتح محمد فؤاد
كاريزما اللّيل
الليل ...
أُستاذ ومعاه خرزانة تهدّ الحيل
برّاية بتبري الروح والناس
ترباس بيقفّل ع التفاريح
كما ريح بتسافر عكس السير
أو سير بيحط علي المجاريح
لليل تعاريف ...
في الريف بيقولوا الليل فيَضان
بيغرّق زرع القلب البكرْ
وسمعت كمان بيقولواالليل ..
غَلوَشة الراديو ف وسط الذكرْ .
الليل سخّان بيسوّي الجرح علي المناديل .
بيقولوا كمين منزوع م الرَشوة و م التَساهيل.
قُضبان بيشنكل سير الحُزن لحد الشمس.
اللّيل سجّاد مفروش دباديب بترُص حكاوي لواد مفعوص .
سجاد متروس دبابيس في طريق الواد بعد العشرين.
اللّيل زنازين وبتخْلي سبيل الهم علي المقهور،
أو قول عصفور هربان من تار بيطلّع وَجَعه علي الزغاليل.
اللّيل مواويل بتموّل لحنها م التفاصيل .
فنجان بيدَوّب فينا المُر الهارب منه الكاس.
اللّيل فنّان بيألف كل غُنَاه من وجع الناس.
بيهزّ بوقته الوَتَر الكامن في المخاليق
م الضيق بيلَحَّن كل كاريزما الصوت والموت
من غير الناي بيفصّل صُوت الناي ازاي ؟!
اللهُ أعلم وَحدَهُ باللّيل
الحُزن أعلم بالوتر والناي .
---------------------------------
علي راس السنة شَواكيش بتخبًط م الماضي .
مش فاضي أولّع نار ف الجو.
مش حابب اغني مع العصافير.
غنّيت والغُنا عشمني كتير،
ولقيته مزوًد في المسافات .
مش عايز كدب علي الأعيادْ .
مش هطلب تورته من الحجه .
ولا هعمل ضجًة مع الأولادْ .
كل اللي عليا اني اتهجًي
فواتير الماضي من العداد.
في العام الفايت من عمري
هيًصت كتير
وفرحت كتير بالبُنط الجاي .
وخرجت ف يومها البلكونة ..
فضّيت شَمروخ بيطلّع صُوت كالطلق الحي .
كان ابويا يقوللّي يا واد اعقل
فترد الحجة عليه وتقول : ( ابنك مخلول .. زي الأطفال )
زي الأطفال....
علّقت الضي علي الأَحبال .
ومشيت علي عمري بمية منوال.
وعملت اهو زي النَص م قال
وشريت دباديب
واتسبت وقلت يا واد ده نَصيب
وحاسبت بعُمري علي المشاريب
من غير ما أدوق إلا القهوة
م الشهوة المُخلصة للذكري
قدًمت المُكره ع الشَهوة
صنًعت بدمع العين تِمثال
وشافوه أكلوه زي العَجوة
مخرجتش م الفَايت باللينك
العيد ده فشنك
والفَرح فشنك إذا كان مَشبوه
والدرس فشنك إذا كان متأثر بالdejavu ) (
الـــ ( (Yearلا سعيد ولا حتى ( (New
طاب دوس (review )
وهتعرف إنك حد عبيط
بتحاول تشبع م الدنيا
وبتنسي الواقع بالحواديت .
--------------------------------
زي النهاردة
زَي النهاردة من 17 سنة
عَيّل بيشبهلي أنا .. سَارح في سن اللاشعور
أو بالأَخَصّ اللا شعور بالوجع
عيّل جدع
كل أما بيشوف الحَمام يرفع إيديه ويوَدّعُه
أو لما بيشوف الصلاة ف وجدان أبوه بيقلّده
يركع مَعُه .. يسجد مَعُه .. وبيسمَعُه فيقلّده
ويغنّي
عيّل محنّي شُوفُه بالألوان
حين يمسك الأَقلام يرسم قَمر مَكسوف .
ماسك في إيده الزَمزمية وعادد المصروف .
الخوف بيتجسد في ناظر مَدرسة.
قمّة أَسي هذا الولد لو أهمل الواجب .
عيّل مُشاغب .. لم يَنل تجريح
أَكبر خطيئة بيرتكبها لو لسانة شَق سير الريح .
عَصفور طَريح وبيحب الشتا .. جداً
علشان بُخار الحَلق بيدفّي الطريق.
عيّل بَرئ
وساعات خَنيق لما بيسأل أُمه عن سبب الوجود ؟
-وازاي يكون للكون إله مع إنّه مش مَوجود ؟!!
- وليه الشمس والقمرة تَمَلّي بيلعبوا مراجيح ؟!
- وليه الريح بتعمل م الشجر تيمة ؟!
-وليه الغيمة والغيمة بيبكو لما يتلاقو؟ !!
- وليه الزرع راسه لفوق .. كإنه بيدعي خلَّاقُه ؟!!
- وليه الميس بتاع الدرس .. بتشكر ربنا علي طول ؟!!
- وليه اللعبة بتخَبيها لما أقول : ( أنا مش هعمل الواجب ) ؟!
أنا فاكر في يوم ما وقفت كالحَاجب ..
وكان عُمري يادوب ترمين
وقُلت خلاص حَفَظت الدرس
وهاتي اللّعبة من ع النيش
ومن صغري واما مُدرك
بإني في الحياه كالترس
كُفوف الساعه هتلفُّه كما الدرويش.
-----------------------------------------
سيرة ذاتية
- محمد الفاتح محمد فؤاد -
-من مواليد محافظة المنيا / مركز مطاي- 14 / 9 /1994
- طالب بالفرقة الرابعة – كلية الهندسة الزراعية – جامعة القاهرة
-حصل علي المركز الثالث في مسابقة الزهراء بالاسكندررية من بين 120 شاعر من مصر وخارجها عن قصيدته ( وداع )
- نُشرت بعض أعماله في سلسلة إخناتون الأدبية 2015 .
- حصل على بعض الجوائز الإقليمية في شعر العامية التابعة لمراكز شباب المنيا .
- شارك في العديد من الندوات والأمسيات الأدبية في العديد من محافظات مصر .
-له تحت الطبع ( كاريزما )– ديوان شعر –
موبايل : 01021121640 - 01145607583
Facebook : Elfatehfouad@yahoo.com
مواضيع مماثلة
» موسوعة شعراء العاميه المصريه / فؤاد حداد
» موسوعة شعراء العاميه المصريه / فؤاد حجاج
» موسوعة شعراء العاميه المصريه / احمد فؤاد نجم
» موسوعة شعراء العاميه المصريه /محمد عطوه
» موسوعة شعراء العاميه المصريه / محمد العتر
» موسوعة شعراء العاميه المصريه / فؤاد حجاج
» موسوعة شعراء العاميه المصريه / احمد فؤاد نجم
» موسوعة شعراء العاميه المصريه /محمد عطوه
» موسوعة شعراء العاميه المصريه / محمد العتر
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى