موسوعة شعراء العاميه المصريه /سونيا بسيونى
صفحة 1 من اصل 1
موسوعة شعراء العاميه المصريه /سونيا بسيونى
ياكحل حنان مكحلنى
سونيا بسيونى
ياكحل حنان مكحلنى
مزوق بالهنا عمرى
ياشمسى ودنيتى وفجرى
وانسى ف وحدتى وهجرى
وقطرة حب تروينى
تفسر لى مواويلى
وخلى كمان ف طول ليلى
ولما اغضب تغنيلى
ولما ابرد من الدنيا
برمش العين تدفينى
ولما اسرح معاك لحظة
ولا نسيتك ف يوم لحظة
على بساط الهوى تجينى
ولما اقول بقى .. عمرى
ترد تقولى ياقمرى
وترسم ف الهوى امرى
وشجرة بالحنان طارحة
فروع سارحة
تغنى قطوفها للفرحة
فرح قربك
يدفى الليل خلال بعدك
منا قبلك هوى غيرك ما بعرفشى
مسهر جفنى ما بتمشى
وباعد نومى عن رمشى
وكل النوم ما بيجينى
يجينى طيف ينسينى
وصوت عمرى
يجى يقولى
قولى لخلى
ياكحل حنان مكحلنى
ومالى بالوفا عمرى
ولما الغيم يشاغلنى
تكون خط الدفاع عنى
كمان فيه غيمة سهرانة
بصحبة قمرة حيرانة
مناها ترسمك فرحان
امل طارح ف كل مكان
و تتبسم كمان ليا
يامالى كل ليالية
يابحر امان
وشط حنان
روحى بقلبك بقالها زمان
ياروح .. روحى
ياصوت بوحى
ياطير عشه
على سطوحى
وهمسة تانية بتقوللى
عنيك دنيا
وشهقة حب حسيتها
ف هوى سونيا
فى حبك شوق
بيسعدنى
فى صوتك شىء
بيقلقنى
ولما تهمسه ف ودنى
واخاف قلبك ليبعدنى
ياكحل حنان مكحلنى
مزوق بالهنا عمرى
سونيا بسيونى
-------------------------
دموع
جرح السنين
قتل الحنين
خلى الدموع
محتارة.. اة
تشكى لمين
وعيونه كانت
تهمس أنين
وساب قساوته
تقول كلام
مليان ملام
ولقيته ينسى
عشرة سنين
حنانى كله وهبته ليك
وبنيت أمانى حلوة بإيديك
بنينا عش ..ف سحابنا عالى
كبرنا حب .. ف حياتنا غالى
وكنت فعلا بخاف عليه
من نسمة جاية تجرح عينيه
شايلة معاها شىء م الأسية
خبيته وحده كان جوه قلبى
وقلبه ينبض دقات ف جنبى
ما كنتش أعرف أقسى عليه
خدعنى فجأة .. أة م الخداع
وبقسوة جرح قلبى اللى ضاع
سكر كلامك .. حلا مرارك
حتى ف غرامك .. كان صعب .. نار
بعد دا كله .. خنقته ليه
همسك دا نسمة.. كان فيه طراوة
وحرف حبك .. معجون شقاوة
ماتقولى طيب .. نسيته ليه ؟
كلامك أنت .. كان بالعيون
وروحى كانت .. ضماك تصون
خايفة عليك .. لحظة بعاد
والشوق يضيع .. بين العناد
كان قلبى يسمع .. ويقولى أة
يرقص وقلبك.. يرقص معاه
كان قلبى شايل ..حب وغلاوة
ولا مرة بين .. كره وقساوة
لكن أنت تانى .. أتاريك نسيت
وياريت ما كنت .. وياك بديت
كان قلبى عايش .. ولا شىء ف باله
خبطت بابه.. غيرت حاله
خيبت ظنه.. وضاع أماله
دلوقتى جايلى .. بالإعتذار
وتقولى أسف..دا البعد نار
ما عرفت عنك أنكر لحبى
مقدرشى عنك أبعد أخبى
وعنك إنت ياسر حبى
لكن هقولك وإسمعها تانى
جرح السنين
قتل الحنين
خلى الدموع
محتارة ..أة
تشكى لمين
سونيا بسيونى
-----------------------------
نجمة ليل
نجمة ليل وقمراية
ونسمة حب جواية
سلاسل سهد وحكاية
باسمك انت مجدولة
بنغمة حب مغزولة
ف دلتا القلب مروية
بشوق سهرانة وياية
يقول لى عمرى يا هناية
كمان فيه كلمة سهرانة
تهدهد قلبى وبقوة
ياليل بيطول ملوش اخر
وباستنى لضلاية
وشجرة طارحة جواية
حنان اخضر بيتمختر
وجوة القلب
وبيسهر
يقول كلام
وكله حنان
ولما يسمعه
يسكر
ياروح عمرى
ونور فجرى
وبوح همسى
يايومى وبكرة وامسى
ونسمة عصر تلمسنى
وبتقولى
تعالى نعيش سوا لحظة
ونهدم للالم اسوار
ونكتب حبنا من نار
ونرسم احلى ضحكاية
واقولك برضو دى حكاية
واقول واحكى مع قلبى
وعمرى عليه ما حاخبى
ماهو انت عمرى وهنايه
وقلب قلب دنيايه
وليل طارح
من امبارح
بيستنى قمر سارح
يعدى الليل
على عيونى
ويهمس لى
يشاورلى على نجمين
انا وانت
وعين هايمة
وليك عايمة
بشوق وحنين
فى ضى
احلى قمراية
سونيا بسيونى
---------------------------------
سونيا بسيونى
عضو اتحاد كتاب مصر
ليسانس اداب القاهرة
مدير عام مدرسة الزهراء الرسمية لغات ادارة الساحل التعليمية
عضو نقابة معلمين
عضو المجلس المصرى للشعر العامى
عضو جمعية مبدعى مصر
سكرتير نادى ادب روض الفرج
عضو بالكثير من المنتديات الادبية
مؤسس منتدى قمر الشرق باتحاد كتاب مصر
حصلت على العديد من الجوائز وشهادات التقدير
العديد من البرامج التليفزيونية
محاضر مركزى
العديد من الاصدارات فى ادب الطفل مدرجة بقائمة التربية والتعليم فى المدارس
اهتم برعاية المواهب فى شتى المجالات
الاصدارات
سلسلة حكايات تهذيبية للاطفال سبع عناوين مختلفة عن دار المجد للنشر
كتاب مسرحيات مدرسية للاطفال جزء اول
كتاب مسرخيات مدرسية للاطفال جزء ثانى عن دار سنابل للنشر والتوزيع
رواية البطة المتمردة للاطفال عن دار البطوسى
مجموعة قصصية للكبار ويندثر الغيم فازت بالنشر عن مركز عماد قطرى
تحت الطبع ديوان شعر عامية
مواضيع مماثلة
» موسوعة شعراء العاميه المصريه / سونيا بسيونى
» موسوعة شعراء العاميه المصريه / امال بسيونى
» موسوعة شعراء العاميه المصريه / ابو زيد بيومى
» موسوعة شعراء العاميه المصريه / احمد ابو حج
» موسوعة شعراء العاميه المصريه / على سيد شحاته
» موسوعة شعراء العاميه المصريه / امال بسيونى
» موسوعة شعراء العاميه المصريه / ابو زيد بيومى
» موسوعة شعراء العاميه المصريه / احمد ابو حج
» موسوعة شعراء العاميه المصريه / على سيد شحاته
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى