موسوعة شعراء العاميه المصريه / رشا الفوال

[url=][/url]

قصيدة / إحتمال
____________
إحتمال الفرحة تيجى منك انتَ
وانتَ مش دريان بحاجة
إحتمال انَك تعدِى بحر يأسك
وانت نفسك مش معاك
إحتمال تلقاك هنااااك
عند شمسك
لما هاتبوسك برقة
لسه شايله فـ قلبها لليوم دا دقة
إحتمال انك تعافر
وانت بتزيح السحاب اللى محاوطها
إحتمال انك تفوتْهَا فيك شوية
لجل تنسىَّ برد روحك
إحتمال الليلة روحك تبقىَّ مِلكَك
شوفت عِنْدَك؟
وصلَك ليِهَا بهداوة
شوفت صَدك؟
دوق بقا طعم الحلاوة
من معانى شايلة حِسَك ع الشفايف
شوفت خوفك ؟
قول ياريتنى ماكُنت خايف
قول تعالِى فـــ حضنِى تانى
مش أنانى
بس فعلًا قبل نورك
كنت فاكر
إنى رغم العتمة شايف




-------------------


قصيدة / حالات بحالات
________________
بتحكِى الليلة نفس القصة وتعيدها
وفـ الخلفية صوت " ثومة"
ونبرة صوتك الخافتة
تجسد روحى مقسومة
وتطرح فرحتى ع الأرض
ويدْبَل فيَّا شجر الورد
فـ عِز النشوة اكون صحرا لرمل عنيك
واكون فكرة بترفض فيك
واكون إيدك
عشان تتمَد ماتطولشى
واكون أنفاسَك الثايرة
تقول " جايلك "
أقول " إمشِى"
وقطْع لسانك اللى بيرمِى فيَّا آهاااات
وقطْع إيديك بتخنقنى برعشة موت
يفوت منِى نَفَس واتنين بدون تركيز
عشان القصة أكذوبة
ونبرة صوتك الخافتة بجد تغيظ
تفوز الليلة دى بقهرى كمان مرة
عبير الورد من بدرِى رموه بره
وبره كتير باكون نَفسِى بميت فكرة
وبره كمان باشوف بُكرة مايوجعنيش
مابيعشنيش حالات بحالات
أخون صوتى واقضيها سُكات فى سُكات
بدون توصيف
كلامك بور مدبحْنِىِ بشكل مخيف
تفوز الليلة دى بقهرى كمان مرة
وتتمدد
وتتحدد حروف إسمَك ملازمانى
وتتهدد معانى الرحمة فـ لسانى
وعانِد فى الجحيم روحى
وشِد عليها ماتلينشى
وقول " جايلك "
هاقول " إمشِى "
هاقول
" إمشىِ"



-------------------

قصيدة / نغم مشدود
_______________
سبقت الشمس جيت عندك
مابين الغفوة والصحيان
نخيلك ليه جريد مفرود
نغم مشدود
بيطرح فيا كُل آدان
دُعا وتواشيح
بتبقى صريح هِنا فـ حضنى
وسنة بسنة بتاخدنى
شروق دافى
وترمى الشوق على كتافى
حنين وآهات
سابقنى والسما صافية
عيونى عليك ماهيش كافية
ولا ضم الإيدين كافى
يعيد العُمر م الأول
بلهفة وشوق
تعالى ودوق
طريق الجنة فوق كفى
وصفى القلب م الأحزان
وفوق صدرى هِنا غفى
وتبقى الوردة فـ كتابى
حجابى فـ وقت شدة وضيق
وبابى لو طريقى يضيق
لعالم تانى م الملكوت
تفوت الليلة ويفوتوا
زحام وضباب
ونبدأ تانى نتمنى
ونستنى دفا الأحباب
ونبدأ تانى نتحنى
بنيل خلاب
مالوش فى الدُنيا دى غيرنا
دا ربك سبب الأسباب