موسوعة شعراء العاميه المصريه /ابراهيم رضوان

[url=]
ابراهيم رضوان[/url]



التجربه رقم 38 من ديوان الذى ما زال يكتبنى عن الشخص الآخر
كان حضرة الصول اللى لابس..
كاب جديد .. على بدلته
شايل همومى ..
من بداية مولدى
كان كل يوم..
بيصلى حاضر ..
للإله..فى معبدى
كان كل يوم..
ييجينى جايب خير ..
فى قرطاس الدقيق
دا ما كانشى والد.. كان صديق
و طريق لقلبى اللى ابتدى..
يعزف حروفى الخضره ..
من أجل الوطن
علمنى أرفض فى الوثن..
لو كرسى ..
فى وسط الكراسى المجرمه
عامنى إن الرب واحد فى السما
فجأه..وقع.. صابه الشلل
فى البيت حدث.. حادث جلل
ما بقاش خبيز جوه الحلل
و لا بل ريق.. .. جوه القلل
صاينى الخلل
فخرجت من نفسى عشان..
أحضر حوار..
بينى و بين الشخص تانى..
با ختصار.. قاللى..
* دا حكم اله..
و حكم الله منزه *
قولتله..
**إشمعنى ابويا..
دا ظلم واضح للى نام **
قاللى..
* المرض مالهوش كبير*
**طب و العمل؟**
*موجود مجير *
و.. همسلى ..
* إن الله قدير..
رحمن.. رحيم
يملك مصير الكل..
مش محتاج مناقشه فى الأمور *
مين انتصر ؟..
كان التعادل بيننا..
مات
بعد انتهاء عمره الجليل..
أنا باعترف..
إنه حقيقى على صواب
صاحبى اللى لسه كل يوم با ستنظره
و لحد آخر لحظه لىّ فى الحياه
باصص بقلبى ع الإله
فى كل يوم..
باستغفرُه

[url=][/url]

التجربه رقم 36 من ديوانى عن الشخص الآخر
* مين اللى كان وياك ؟..*
** مفيش ويايا غيرك **
قولتهالها ..لحد ما قالت..
* لا يمكن..
كان معاك إنسان ملامحه بتشبهك *
**مين اللى كان ويايا ؟ **
* كائن من خيال..
أوقات كتيره يشرفك..
و ساعات كتيره يشوهك
لو غيبت عنه ..يندهك*
**دا كدب.. أيوه و ادعاء باطل..
و زحمه.. و.. ثرثره**
قلعت هدومها..فشفت فيها ..عاهره
فهجرتها
و خدتنى خيل القاهره..
حيث الأغانى البرتقانى ..
و الأمانى و الليالى الساهره
*قابض ؟*
**أنا ؟..قابض فى جمرة مبدئى
أفضل وحيد طول المدى
أنطق فى كلمة صدق..
تتحول قصيده
ليها ميت مليون صدى
كلمه تهز الأفئده**
فجأه.. فى مبنى القهر..
مبنى العُهر..
بانت فى جميع الأمكنه
مش ورده..لأ..مش سوسنه
دى الغوله فى كل اتجاه
غضب الإله ع الأوليا
خبيت فى نفسى بأغنيه
ظهرت فى كل مكان..
معاها شخص.. يشبه ملمحى
فسألتها..
**لو تسمحى..
مين اللى لازق فيكى..
شايل فى بطاقتى.. بدون سبب ؟**
فقالتلى..
*هو اللى انكتب..
أيوه عليك يا حبيبى..
يا شلال أدب
هو اللى كان وياك..
و.. أنكرت ف وجوده..
رغم إنه كتب عشانك شعر..
فى كل الكتب*

[url=][/url]
التجربه رقم 35 مد ديوان عن الشخص الآخر
* ما تخافش *..
قالهالى.. و.. هرب
فطبعت شعر 0 الدنيا هى المشنقه 0
* ما تخافش *
أيو حاولت اوسع ..
فى الدروب الضيقه
*ما تخافش *
روحت الندوه أهتف..
للمعلق من هدومه و صُرته
أصبحت صوته.. و كلمته
* ما تخافش *
كان صوت الوزير الندل ..
0 حافظ غانم 0 الفظ الغليظ..
مهزوز.. أصابنى بالقرف
قاللى..
***ضرورى تعترف..
إنك عدو المملكه ***
و رمانى جوه سوهاج..
فى حاله مُربكه
0شعراوى جمعه..0
بعتلى برتيتة عساكر..
كلبشوتى..و رحلونى القلعه..
فى التحقيق مضيت على كل شئ
0قلب النظام فى الجكم..
طبع المنشورات
الشوشره..
على كرسى دايس لسه ..
فوق عقل الجميع
إطلاق محيط أشاعات..
تدمر فى العقول0
* ما تخافش *
كرباج العجول..
علم على ضهره معايا..
و انحنيت..
أمسح دموعه..
لحد ما جينا 0 طره 0
كانت مفاجأه..لما قالوا إنهم..
من يوم قدومنا اتحذروا
* ما تخاقش *
أيوه همستلُه..
**و الله مش ممكن علينا ها يقدروا..
ما تخافش** ..
..لكن..
كان على * البُرش * القديم .. نايم..
بكيت من منظرُه


التجربه رقم 34 من ديوانى عن الشخص الآخر
ماشى ورايا..فى كل حته أروحها..
*حاسب من دخولك قاعه نجسه..
و برضه حاسب م الغرق *
**ما تخافشى **
يمسح فى العرق
و يقوللى
*إنت تعبتنى.. غلبتنى ..مرمطنى
لففتنى وياك فى آلاف الحتت..أرهقتنى *
أهمسلُه..
**مش ممكن فى يوم..
ها امشى على سكة خطأ *
**طب ليه لسان الجوع ..
فى أرغولك نطق ؟
أهمسلُه ..
** لأ..
عمرى ما كنت فى يوم رخيص
و لا نمت غير جوه الشبع..
مهما يكون **
* بصه عليك كل العيون *
**ما يبصوا..
مش ممكن ها يقدر حد..
يكتب عنى كلمه ملوثه **
* الدنيا من حواليك..عقيمه.. مدنسه *
**و انا مالى..
سيب المُلك للرحمن..
و كون عبدُه الشكور **
يرجع ورا
و يخاف علىّ من كلاب القاهره
و من النفوس المنظره
و يقوللى..
*قلبى مازال معاك حارس أمين
و كلامى لك.. قد أنذرا *
أهمسلُه..
**مش محتاج نصايح من لسان..
مولود معايا فى لحظتى **
فيبص لىً..
أشوف فى شكله هزتى
و يسيبنى يائس م المناقشه..
من ردودى الغير حكيمه و مقنعه

أقفل علّ الأوضه..
و استناه لحد ما انام..
تجينى فى المنام..
أنثى..
فى هيئة ضفدعه







التجربه رقم 29 من ديوانى عن الشخص الآخر
كان فيه شتا
علشان كده..
كانت جنازته..زى كل حياته..
هاديه صامتَه
ماشى وراها ..خلق ياما..كلهم..
لابسين هدوم متخططه
و كتير من الناس اللى جوه الزحمه..
كانوا ع الدروب متنططه
و قليل من الماشيين وراه..
كانوا على صاحبى اللى سابنى..
معيطه
النعش كان من غير غطا
بصيت عليه
و كانى باصص فى مرايه مثبته
بدء الدخول ع الشحططه
بدء النزول م الفجر..
بعد الدفن..تحت المخرطه
القلب كان مشغول بحالة خربطه
عناقيد عنب.. متفرطه
...........................
دغنوك فى نفسك يا فتى
و رجعت بعد الدفن..
مش موجود فى غير..
حدوتة الناس اللى عاشت..
و اللى ماتت مُحبطه



التجربه رقم 25 من ديوانى عن الشخص الآخر الذى لا يفارقنا مهما كانت الظروف
كان القمر عرجون..
و كنت حنون معاها..
فى نومه فوق شوك الكنب
سمعتنى..
لما قريت عليها الفجر..
كل اللى انكتب
سألتنى..رايح فين ؟..
أخدت إجابتى من ضلمة كُتب
و.. رجعت نص الليل..
على هدومى بلل
جابت رغيف بالملح..
كان فى حشايا غطيان الحلل
قالت..حياتنا خلاص..خلاص..
صابها خلل
................................
شافت دموع فى عنيّه..
ضاغطه علىّ ليه الدنيا..
قالت لىّ..
فيه حادث جلل
فين كل يوم بتروح..؟..
رفضت أقول..
بأنى يوماتى باعصر فى العنب
تعبت معايا كتير..
خرج منى اللى خانها..
و قال هاصونها بقلبى..
كان..
...................................
من تحت منخاره الغريب..
وقع الشنب




التجربه رقم 24 من ديوانى عن الشخص الآخر
فى السر.. متخانقين سوا
فى السر..
كان بيجينى لو تعبان..
يجيبلى فى الدوا
و أجيبله برضه فى الدوا
لو انام..يجينى فى حلمى..
و..يحذرنى من نار الهوى
أصحى..
و ألبس هدمته المنشوره..
فوق حبل الغسيل
أوقات يكون الندل..
فيه أوقات كتير..يصبح أصيل
و..أبص من طرف العيون دايما عليه
ألقى مرار الدنيا فيه
فأروح معاه
يقرى الحروف أوقات كتيره..
بدون ورق
ينسى كلامه ساعات..
فيستنجد..
و يدخل فىّ تانى..
يغوص فى نص الذاكره
يلقى حروفى .. هى نفس حروفه..
صادقه.. ممرره
* إطلع بقى قدام *..
ياخدنى للورا
يقعد معاها حزين..كسير..ع القنطره
يزهق معايا..
لأن كل النومه صبحت ثرثره
بدأ السعال..و..الغرغره
فجأه..صحى م النوم..
و أقنعنى نعود ..من تانى بيتنا..
من جديد
و نسيب كلاب القاهره..
للقاهره




التجربه رقم 23.. من ديوانى الذى ما زلت أكتبه عن الشخص الآخر الذى يسكننا جميعا و يعيش و يموت معنا
* الموت علينا حق *..
زق الباب ..و.. تاه
كان نسمه فى دايرة حياه..
ما بقتشى فى الواقع حياه
و.. مشيت وراه
كانت جنازه مهيبه..
كان النعش من أبنوس طرى
و ..3000 ظابط برتبه..
و كل رتبه ..وراها واقف عسكرى
و انا كنت ماشى وراه..
أدارى فى دمعه..
وقعت ع الخدود..فى المنتصف..
زيُه..على جسر الحياه
* الموت علينا حق *..
زق الباب و.. تاه..
بين ألف جثه اتحللت
الناس دى ليه اتبهدلت ؟..
بين التراب و العضم..
و الريحه اللى بانت..
من هدوم بيضه.. بتشبه للكفن؟
و رجوع سفن..
من ألف ألف مدينه داست ع الجباه
* الموت غلينا حق *..
زق الباب و.. تاه
و..دخل حزين القامه..با ستسلام عجيب
كان الغريب طيب..
مفيش جواه دما
القبر كان سقفه.. سما
قفلوا عليه الباب..
صرخت بدون شعور
الكل بص على القبور الضيقه
صرخة شقا..
خرجت من القبر اللى كان..
حاضن فى جثة كهل..
عمره ما داق فى يوم..
غير كل أنواع الشقا



مخنوقه ليه يا سوسنه /
شعر : ابراهيم رضوان /
عضو مؤسس بالمجلس القومى للشعر العامى
مخنوقه ليه يا سوسنه
ونتوه فى ألف مغاره ..
ندخل فى الحلل نخرج فراخ مسروقه للوالى اللى شمر ..
بنطلونه البُنى قبل ما يترعش
نايمه الصبيه فى العشش مسلوقه بالحر اللعين
تحلم بزوج أخضر .. عفى "
خايف قضيب القطر تانى ينطفى "
ونشمم الميت بزاز اللكلكه داست علينا الفسطه .. جوه الشتا .. والفبركه
وبقينا زى " فيران " فى حُجر المملكه
وانتى ما زلتى بتستهجى شهقتى .. فى الموج .. وموج البحر " فار " والنار خدتنى لقعدتك ..
ومفيش فرس وما عادش جوه هدومى إلا الصمت ..
والشهوه اللى بتقربنى من لحم العرس
يا ام العبايه مرايه فى الزمن المصدى
من جناحه .. إهربى واتشربى .. شِعرى ..
وسيبك من جناب الباش أغا
الباش أغا لسه مريض
بيبيض فى بيض الدهشه .. يفقس ألف شاعر فزدقى
يا ام العبايه مرايه فى الزمن المصدى من جناحه .. أشرقى واتشرنقى ..
جوه الولاد الخُضر ريش مليون جناح كونى السلاح ..
لو فيه غفر كونى السماح ..
لو فيه خيانه منى فى الزمن اللى خاننى
من زمن  
ولا تلعنيش أم الوطن
وطنى ووطنك عودوه ع الإنشكاح
والنومه للكرسى الدهب
وطنى .. و .. وطنك .. إتنهب ..
من ألف جيش " بكاش " عنيد
من كل " كرش " و " بدله " مدهونه رياء
من كل كلب قديم بيتهجى حروف " الخنفره "
يخطب .. ويتلفت على نسمة معارضه ..
عشان يدوسها بالجزم
واحنا ما زلنا هناك حزم
واحنا ما زلنا سراب هنا
مخنوقه ليه يا سوسنه مسروقه م " الحاج " اللى بان قبل الدخول ..
ثم اختفى محروقه ليه بالتفتفه والعض فى بزازك بأنياب القرف
كل اللى فى الجيب انصرف حتى الشرف ..
قدروا فى ليلهم يدفنوه ويلونوا كل الوجوه وبقينا زى الريح .
. صراخ مالهوش سبب " محسن " ..
ما زالوا بينفخوه .. برغوت غبى " محجوب " بيجرى ع السهول ..
جحش البقايا اللولبى  " أيمن " .. بيتاوب على حِجْر الفراغ ..
قومى لأيمن أدبى " طارق " ..
سابُوله الجزمه .. أزمه فى الدماغ
مدى الإيدين ع الفتحه ..
يا الله طبطبى جوه " القناه " ..
مليون بريصه مقرفه وكلاب بتجرى من ميدان " العباسيه " ..
تدوس على رمسيس ..
تبول ع الأمكنه
مخنوقه ليه يا سوسنه وانا لسه باسأل عن عنيكى يوماتى ..
واكتبلك حروف قلبى بيرجف .. لسه غول الخوف ..
بيسحل نومتى فوق أطلال ضلوعك
قبل ما يبان الأدان مشنوقه ليه بحبال جبان .
. وسيوف " مخاصى " .. بيخصوا فيكى بالصراخ داخ اللى داخ يا حبيبتى من أجل الرغيف
شاخ اللى شاخ فى الزيف .. وبير الكدب دايما مش نضيف ونضيف إليكى كتير كتير ..
ولا تكبرى بيشلحوكى ليلاتى قدام الديابه اللايطه فى طين الجفاف ويسلحوكى بشمروخين ..
صبحوا فى لحظه " أنتيكات " سرقوا خضار الكُحل من نظرة عنيكى ..
واما روحنا عليكى نجرى .. داريتى فيهم بالرموش أدمنتى تكسير الوحوش ..
لضلوع وليفك فى السجون آه يا ديوان مجنون بيتحدى " الأباطر " و " التتار "
وبيطفى ليل المسكنه مخنوقه ليه يا سوسنه يحميكى شر الإختناق دخل النفاق ع القاعه ..
خَلَّى الكل فاق و " الجو " راق ..
لما الأسد .. وزع عليهم جثتك رغم انسحاق الوجه .. كانت بصتك .. سخنه .. بتستعطف جميع الكائنات
ولا حد فيهم رق للقلب اللى ضاق
ولا حد فيهم بص ناحية " عورتك " المكشوفه للكاميرا ..
اللى قاعده تلف فوقك .. ترمى ع الفخدين ." شبق "
ولا حد بعد الموت قدر ياكل نبق
مع إن ناس القاعه بينهم قسموه آه يا غباء كاسى الوجوه آه يا انحناء ..
خلى الحبيبه قبل موت الروح تتوه آه يا فراخ جربانه ..
يا ديوك اللصوص النمل عشش فى النفوس والسوس دخل فى العضم ..
كل العضم طقطق .. طقطقى ولا عُودتى قادره تُشرقى ولا عُودتى قادره تُغربى ولا عودتى قادره تِشرقى ولا عودتى قادره تِغَربى لابسه فى توب الموت .. ولونك فزدقى وبِتْشَرقى .. لو مَيتى .. لمست شفايفك فى المسا إيه اللى خلى جميع سلوكك يا حبيبتى مِنَمِسه عروكى واغتصبوكى عند المنحنى مخنوقه ليه يا سوسنه وحزينه أثناء انثناء الرقاصات .. فوق المكاتب والكراسى والقطيفه والبدل مين اللى قال إن " الميزان " .. " عما قريباً " يا حبيبه هايتعدل إزاى وصوت " المعزه " سايد .. قايد الدهاليز خواء إزاى وطعم الإنحناء .. فى الحلق صبارة قرف  إزاى وطير اللى انحرف ..
بيبوس طيور كل السحب عايزيانى .. تانى .. أنسحب ؟
إزاى وانا شلال عطا ياما ناديتك فى الشتا وغزلت من جلدى غطا
ودفعت عمرى سنين قضيتها فى ضلام المعتقل وحاربت غول السفسطه
إزاى وانا اللى نطقت لاجلك فى السكوت ورضيت أموت م الجوع ولا .. ثانيه .. أخونك .. زى .. ما .. خان .. الجميع
عايزانى .. تانى .. ليه .. أضيع وانا لسه فوق صدرك رضيع .. رغم العجز خمسين سنه ؟ ..
أكتر .. ناديتك فى الزحام وقطفت عنقود العنب وبلعت عنقود اللهب واما الشهب ..
بانت فى نن عنيكى ..  عبيت الزياره فى جيبى .. واتبسمت فى دخلة ولادك ع الغريب
شايلين لهب
واما انحنيتى ع الدبيح تترحمى نزلت دموعى معاكى .. واتحنيت بعتمه مفزعه
إحترسى .. دول عايزين يخلوا الإبن بوق مالهوش صدى والبنت تصبح ضفدعه إحترسى ..
دول أصل اللواط والسرسعه عروكى .. وانتهكوكى فى الزمن الصعيب صلبوكى ..
جرجرتى الصليب وبكيتى فى عهد الصراخ والابتهاج بلوكى لما البحر هاج هدموا البروج العاج ..
وداسوا التاج .. وفضلوا ينهشوا دخلوا عليكى يفتشوا وساقوكى وانتى مكبله
ما تحلميش بالزلزله  إلا إذا عرفتى اللى بالك ..
م اللى شالك فى المحن إلا إذا عرفتى فى يوم الفرق بين جيش الخطيئه العاصى  وجيوش الحقيقه المؤمنه
مخنوقه ليه يا سوسنه وخنقتى فىّ الشِعر ليه  يا ام الجنين نازل حزين
لو قال قصيدة شعر .. مش ممكن هايلقى فى يوم خزين وها يتدبح م الأفاقين ..
المجرمين .. المدهونين .. بالكدب .. قطاع الطرق
سامحينى .. قلبى بينخرق .. وبينسرق .. دقه بدقه بينسرق
ومفيش هلال معدول برق ومفيش ميزان .. إلا عشان .. كوم الحرام والفرفشه
صلى على سيدنا النبى وتعالى سيبك من ليالى الإنتعاش .. والإنتشا
خليكى يا طاهره إمامنا فى العِشا
لكن .. إذا خلص الصلا إتزوقى ..
وهاتيلنا لقمه إن شا الله حاف لاجل العَشا