موسوعة شعراء العاميه المصريه / فتحى نجم

جدع عرفت تحافظ
على نفسك
من ذنب كبير
أسمه الدنيا
ذاكرت الدرس كويس جدا
شعلقت الروح فى كتاب
الزمن
وعرفت أجابة
على اصعب دور فى
حياتك
شخبطت على كل اختصارات ابليس
ورفعت لواء اختصاراتك
وبصبرك وأيمانك
بأن الحاصل
من فعل الرب
عرفت تجدد من ذاتك
جدع صفرت لقطر
الدنيا بكيفك
ولا اتحولتش عن
سكة أترسمت جوا عقلك
قضبان عمر.. سطرت
محطات الحب بوعى
وطنك ..وحبيبتك..
وولادك
والبنت اللى بتغرق
بين قضبان ضلعين
راضخين لعنادك
حبك لصحابك.. ولشعرك
والاهه ال متعاقده معاك
وظيفتك اللى كتير
بتعانى..
علشان كرهاك
وأنت ما ذلت بتحاول تلعب دور
الحبيب
فى كل مشاهدك
وتحاول تنظر للاشياء
بعين العقل



----------------------


عن الشعر و الناس

بافتراض
ان بيت الشعر
مبني من خيال
و افتراض
ان كل الشعرا
معجونه في رؤاها
يبقي ليه بنكفر الرؤيه البسيطه
يبقى ليه
بنباعد المسافات
و بنشرخ بناها
احنا حبة شعر
مزنوقه في همومنا
طالعه احساس ع الورق
و حارقه اعصابنا معاها
ب افتراض ان لكل
واحدلون معين
و افتراض الايدلوجيا
بتكتسب
من بيت مثقف
يبقى عادي يكون فروق
و الشروق في قصيدة يبهر
و قصيده تانيه يبقى ضوء
يبقى عادي
الشعر يغطس في الدماغ
و يطلع الاهه بمزاج
و بردو عادي
لو كلام منظوم يحس
ليه يعامل باحتجاج
بفتراض ان كل الشعب شاعر
السياسي / المراكبي / المنادي الالاتي
الفلاتي / جدتي / عمنا بتاع الخضار
فالشعر ضيف
مثبوت حضوره ف الحوار
و الايقاع مزيكه ماشيه
في وريد الناس بحب
و القصيده شيء ضروري
زاد لسانهم ليل نهار..

الشعر مش ندوه وديوان
الشعر وجدان الغلابه
الشعر كتلة نار تبردها الكتابه
الشعر طلقة بندقيه
الشعر ثوره
و الثورة في الشعر الشراره
الشعر بنبونة مراره
بتحلي للناس الحكايه
الشعر طير
و جناحه ملايين الرؤى
الشعر يكتب بالنوايا
يبقى حلم اليقظه شعر
و الكلام في الكوره شعر
و البصه في عيون الاحبه
احلى مقطع في الوجود
الشعر خولي
و الحرف ورد
يسقي ملايين الخدود
يبقى ليه بنكفر الرؤيه البسيطه
يبقى ليه
بنباعد المسافات
و بنشرخ بناها
احنا حبة شعر
مزنوقه في همومنا
طالعا احساس ع الورق
و حارقه اعصابنا معاها




--------------------------------------------




## خّلـــــــــــــــــــى ##

صديقى ..ما هوش بيطّبّق بنود الصداقه
ووشه بيضحك عليا كتير
ملامحه.. بتبلع حبوب البراءه..منافق كبير..
مغيّر فى صورته ..برغم الملامح تبان هيّه هيه
فايه اللى بيه وايه اللى بيّا؟
مالوش بند واضح مناسب كيانى..وبفضل اعانى
لكون احتباسه الحرارى ..احتوانى
فشّمت ضلوعى.. نيران التواءه
وفارت مشاعل شكوكى.. ف وضوحه
كاعازف ردئ..مغيّر مساره فى طعم الموسيقى
وعزف المشاعر.. منشّذ فى روحه
صديقى ..فى اصعب ظروفه.. لاقانى واقفله
يمّيل عليا.. وامّيل عليه وناخد راحتنا فى قاعدة كافيه
ما بشربشى شاى.. وازعل عشان ماشفتوش فى تفله
واضحك عليا ..لفنجان لاقانى مشّرخ دموع
فاشالنى وحاضنى وكأنى طفله
فيرجع فؤادى.. لبنت احتوتنا فى جنة سطوحه
وكورة شاطتنا ..فى قلب ابتسامه
وكام عين حسودة.. بنقتل سمومها
لكون اللى بّنا علاقه وثيقه ..صديقى
كراسى الموسيقى تعانى اختلال
وروح الملايكه اللى فيا.. بتنزف
غناوى المودة اللى فيك احتلال
فاسبنى اعافر.. فى جوّايا وانهض
واطلب جلاء.. وعقد الصداقه فى قلبى هاشيله
لأنى ما خونتش.. بنود الوفاء
فاسبنى لحالى.. اوجهك بجرءة واضحك بحرقه
لكونى اتعتقت.. من شرط الجزاء

--------------------------------------


- فتحي محمد حافظ نجم
- الشهره ( فتحي نجم )
- مواليد الإسماعيلية 1974.
- عضو اتحاد كتاب مصر....
- رئيس نادى ادب الاسماعيلية
- رئيس تحرير مجلة المرجان الادبيه2014/2015
- محاضر مركزي هيئة قصور الثقافة .
- رئيس بيت الشعر الإسماعيلية
- مؤسس اتحاد مبدعى القناه
- باحث وناقد ومحكم ادبى.
- رئيس الصالون الثقافي بمركز شباب الإسماعيلية .
- شخصيه عامة بمؤتمر ادباء مصر باسيوط 2014
- حصل على العديد من الجوائز فى المسابقات الأدبية على مستوي الجمهورية بوزارة الشباب ..والجمعيات الاهلية... وهيئة قصور الثقافة .
- شارك فى العديد من المؤتمرات والمهرجانات الدولية داخل وخارج مصر .
- لبنان لتمثيل مصر فى مؤتمر يوبيل الألفين 2000 .
- السودان لتمثيل مصر فى ملتقى الشباب العربى 2007 .
- شارك فى العديد من البرامج التلفزيونية والإذاعية .
- صدر له #نخل الهموم / / ملامح بلادى/اورنيك ذنب /البنت اللى بقالها كتير شايفاني
- له العديد من القصائد المنشورة فى الجرائد والمجلات والكتب الأدبية