موسوعة شعراء العاميه المصريه / مجدى عبد الرحيم

[url=]
الشاعر مجدى عبد الرحيم[/url]
تلات صور لمشهد واحد
شعر : مجدى عبد الرحيم

عارف إن المشهد ده
كان صعب عليك جدًا
لحظة ما عرفت إن أبوك
مش راح يرجع تانى
كنت صغير
خفت تخش عليه الاوضه
مع إنك بتحبه قد الدنيا
وأكتر م البحر كمان
................
دلوقتى ..
بتعيد ترتيب أرواقك
وتحاول تِصلِح من أخطاءك
علشان قربت تسافر ـ زيّه ـ بعيد
وتصور نفس المشهد
وبناتك راح تبكى عليك
ويمكن ترفض تدخل نفس الأوضة ..
م الخوف
مين راح يمشى معاك ..
فى جنازتك
غير البنت ال مش عارفه
إن الموت الطالع من جواك
إشاراته كتيرة
والعسكرى مش راضى ..
يفتح سكة لقلبك
تعرف لحظة مالبنت
مسكت ايدك بشويش
هيه دى اللحظة
اللى عدت فيها جنازة روحك
وأنت بتتشهّد على نفسك
وبصوت مش مسموع
الشىء المؤلم فعلاً
إنك سايب للورثه شوية كراكيب..
على كام جورنان
وقصايد خايبة قديمة
زعلان ليه ؟
علشان ولا واحد من أصحابك
كان موجود فى جنازتك
راح ييجوا طبعًا
مع فناجين الحزن الباردة ..
وآيات الذكر ..
اللى بتتفرق على روحك
والشيخ اللى مش ناوى يخلص بدرى
الليلة دى ..
حتلاقى التكريم اللايق بيك
وحتعرف إنك ساكن فى قلوبهم
وإنك - يامسكين - ..
كنت معاهم إمبارح
سهران للصبح
عمَّال تضحك من قلبك
دى حلاوة روح
زى ما قالوا لأهلك
مع إنه آخر مرة سألوا عليك بجد
كانت من ست سنين !!!!
اصبر واستحمل
دلوقتى النور راح يطفى
والكل حيرجع على بيته
ويدوّر على قلبه التايه منه
ويعيد ترتيب أوراقه
علشان ح يصوَّر ..
... .. نفس المشهد
....................
من ديوانى " حاجة تموت م الحزن"
هيئة قصور الثقافة ..عام 2003م
......................................................................................................




بيعدى الشارع مع ست عجوزة
         شعر : مجدى عبد الرحيم
                 
                                           
لمَّا تقابله أكيد
راح تِنشَد
وتحس بجد
إنك شُفته زمان
وانه قريب م القلب
خيط ممدود بالألفة بيسرى ..
مابينه وبينك
مع إن دى أول مرة تِشوفه
يوم ورا يوم
يتسرسب جوَّه مشاعرك
وح تتأكد إن الحَاسَه السَادسه
مُش بتخونك ..
زى اصحابك ..
ورهانك ..
كان على حق
إنسان فعلاً يتحب

       .....

لمَّا حاولت تقرب منه ..
كان سهل بسيط
بَحر ومَفتوح ع الآخر
بيسَاع كل العالم
فيه يركن أى غريب ..
يرتاح
والناس ع الشط ..
تفضفض ..
وتسيب الهم ..
الساكن جواها ..
يجرى ويا الموج
والميَّه بتاخد الحزن بعيد
تتخطى حدود الكون
ترجع أحلام ورديه

      .....                

لمَّا قابلته آخر مره
كان تعبان
وبيهرب من عينك
خايف يقلق قلبك ..
ده ملاك
مع إنه ..
أكتر واحد ف الدنيا ..
شاف أهوال
والفرح عمره ما عدى ..
ف يوم على بابه
   
.....

مُش قادر تتخيل
حَ تعيش من غيره إزاى
مع إن الموت ..
مُش يعنى فراق
والعمر محطات
وانك مُش أول ..
ولا آخر راكب
والرحلة مكتوبة عليك
     
.....

صدقنى ممكن تلاقيه ..
ف جناح طيارة ..
ورق ..
ف إيدين عيِّل
أو بيعدى الشارع ..
مع ست عجوزه ..
خايفه م العربيات
أو على باب مدرسه ..
مِستنى يشوف الفرحه ..
ف عيون الاطفال ..
وقت المرواح
أو فى محطة مترو ..
بيقول أشعار
أو قدام عربية فول ..
وسط الناس الشقيانه
أو ف حديقة الحيوان ..
بيعيش أسعد أوقاته
أو واقف على شط النيل ..
وقت غروب الشمس
أو ماشى ف العتبة ..
الاوبرا ..القلعة ..
السيدة .. شبرا ..
ف شوارع عمرها ما تموت
ولا خطوة رجله ..
ح تبطل دب
أما تقابله أكيد ..
راح تنشَد
وتحس بجد
إنك شفته زمان
وانه قريب م القلب
................................
من ديوانى " لسه بيعشق طير العصافير "
هيئة الكتاب .. 2012م
....................................................................................







مِحتَاج لِعينك يِمكِن أَقدرْ أَمْشِى خَطُوة لقُدَّام
شعر : مجدى عبد الرحيم


السِّكْة مَفْتوحَة
مَدَد
والصَّمت ..
بوَّابة خَرَسْ
والأَمل مَدبُوح
وماعدْش ليِّه اخْتيار
الفَخْ منْصوب للولد
والخِدَع مَحبُوكة جداً
وأنَا عَامِل عَبيط
زىِّ العَبيد
عَايْشه ..
بِتترَجَى من الأسْيَاد
تمُوت
 . . . . . . . .
مَخدوع أنا ..
فىِ طلْعتِك
وفِ نَدْهتِك
زىِّ الجُمُوع ..
اللِّى فرَّقَها السَّراب
لو لسِّه عاشْقة بُكْره ..
سَامحينى
الضِّحك كَان للرُّكَب
والوهم راكِبنا ..
حُصان
أبيض فِ ..
أبيض
فمَاكَنْش واضح ..
للنِّهار ..
إنُه عَمِيل
والمُسْتحيل ..
لو تُرفضِى ..
إنِّك تسِيبِى لهُ اللِّجَام
 . . . . . . . .
أَرجُوكِى يا ..
اسْتحملِينى
شَارب أنا ..
وطَافحْ مَرار ..
سَاكت
وحلْقِى ناشِف
كَما عُود أَخضَر ..
مَرمِى وقت الهَجِير
قَلبِى تِعب ..
مِن كُترة المَشاوير
لسَّه بِيعَافِر
والشِّراع مَكسور
صُوت الطُّوفان
سفَينة  ..
فِ بحر غَادر
رغْم المَوات
مِحْتاج  لِعينكِ ..
يِمكن  أقْدر ..
أَمشِى خَطوة للأَمام
عَشقِك صَبابَة
والدِّيَابة  ..
بَرضُه عاشقِين
ومِكمِّلين
فَ إزاى أنا ..
أَرجَع أَخَاف
.........................
من ديوانى " قبل العتمة بمتر "
الصادر عن مركز عماد قطرى للابداع .. عام 2014 م
---------------------------------------------------------------------------------
الكاتب فى سطور
مجدي عبد الرحيم                                                    
عضو اتحاد الكتاب          
محاضرمركزى بالهيئة العامة لقصور الثقافة
حاصل على جائزة كتاب الجمهورية الكبرى عام 2010 م  فى شعرالعامية .
حاصل على منحة التفرغ من الدولة فى مجال شعر العامية والكتابة للطفل :
اعوام 2008 ، 2009، 2010 ، 2011 ، 2012م
* حاصل على المركز الثانى عن أغنية " الدبه وقعت ف البير " والمركز السابع عن أغنية " يا مرجيحه " فى مسابقة مؤسسة "أنا مصرى" لإختيار أفضل 8 أغانى مبتكرة للتوعية بالهوية المصرية للأطفال ، رأس لجنة التحكيم الشاعر سيد حجاب، الأغانى الفائزة سيتم إنتاجها بالتعاون مع منظمة اليونسيف الدولية .
* تم تكريمه من قبل اتحاد الكتاب ومنحة ميدالية الاتحاد عام 2010م .
* حصلت اغنيته " عاش الشهيد " على المركز الاول فى الشعر الغنائى بمسابقة جمعية الشعراء والمبدعين والمفكرين .
* يكتب مقالات ساخرة فى بعض المواقع الالكترونية  .
* كتب الراحل الكبير أحمد بهجت عن اعماله للطفل فى عددين
متتاليين فى باب " صندوق الدنيا "  بجريدة الأهرام  عام 2008م .
* نشر شعر يومى فى باب " ياوابور  قولى " بجريدة المصريون
فى الفترة  ما بين عامى 2011/ 2012م
الأعمال المطبوعة :
*  ديوان "حاجة تموت من الحزن" - الهيئة العامة لقصور الثقافة 2003م
*  ديوان "مشهد الوداع الأسبوعي– إبداعات- الهيئة العامة لقصورالثقافة 2004م
*  ديوان "توت حاوي توت" كتاب قطر الندى – الهيئة العامة لقصور الثقافة 2008م
*  ديوان " قلبى صُغَيَّرنونو " كتاب قطر الندى– الهيئة العامة لقصورالثقافة 2009م
*  ديوان " يامطرة رخى رخى " كتاب قطر الندى– الهيئة العامة لقصورالثقافة 2011م
*  ديوان " لسه بيعشق طير العصافير " الهيئة العامة للكتاب . عام 2012م
*  ديوان " قبل العتمة بمتر" مركز عماد قطرى للابداع والتنمية الثقافية. عام 2014م  
* كتاب ساخر " هات لى لاب توب ياجوزى " دار سما للنشروالتوزيع عام 2015م
* كتاب ساخر " حنفية .. وبتنزل مية " دار سما للنشروالتوزيع ..  عام 2016م
تحت الطبع :      
* ديوان " مش مكتوب ف الكراريس "          *  ديوان " كيكا ع العالى " للاطفال  
* ديوان  " حكاية توتة "  للاطفال        
 نشرت أعماله فى العديد من الصحف والمجلات منها:
* الأهرام – الأخبار - أخبار الأدب – المساء- القاهرة - الدستور- الأسبوع - الوفد- العربى - المصريون - الاهالى – الاحرار - قطرالندى- كتب الهلال للأولاد والبنات - الثقافة الجديده – مجلة الشعر – مجلة ضاد              
العنوان البريدى الدائم : magdyabdalrehim@gmail.com