وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / عبد الرحمن الابنودى

اذهب الى الأسفل

موسوعة شعراء العاميه المصريه / عبد الرحمن الابنودى

مُساهمة  وكالة انباء الادب العربى في الجمعة يناير 29, 2016 8:00 am

[url=]

عبد الرحمن الابنودى[/url]



يامنه

والله وشبت يا عبد الرُّحمان ..

عجّزت يا واد .؟

مُسْرَعْ؟

ميتى وكيف؟

عاد اللي يعجّز في بلاده

غير اللي يعجز ضيف.!!

هلكوك النسوان؟

شفتك مرة في التلفزيون

ومرة .. وروني صورتك في الجورنان

قلت : كبر عبد الرحمان.!!

أمال انا على كده مت بقى لي ميت حول.!!

والله خايفة يا وليدي القعدة لتطول.

مات الشيخ محمود

وماتت فاطنة ابْ قنديل

واتباع كرم ابْ غبّان

وانا لسة حية..

وباين حاحيا كمان وكمان.

عشت كتير.

عشت لحد ماشفتك عجّزت يا عبد الرحمان.

وقالولي قال خَلَّفت

وانت عجوز خلَّفت يا اخوي؟؟

وبنات..!!؟

أمال كنت بتعمل إيه

طيلة العمر اللي فات؟

دلوقت مافقت؟

وجايبهم دِلْوكْ تعمل بيهم إيه؟

على كلٍّ..

أهي ريحة من ريحتك ع الأرض

يونسُّوا بعض.

ماشي يا عبد الرحمان.

أهو عشنا وطلنا منك بصة وشمة.

دلوك بس ما فكرت ف يامنة وقلت: يا عمة؟؟

حبيبي انت يا عبد الرحمان

والله حبيبي .. وتتحب.

على قد ماسارقاك الغربة

لكن ليك قلب.

مش زي ولاد الكلب

اللي نسيونا زمان







حلوة مرتك وعويْلاتك

والاّ شبهنا..؟

سميتهم إيه؟

قالولي : آية ونور.

ماعارفشي تجيب لك حتة واد؟

والاّ أقولك :

يعني اللي جبناهم..

نفعونا في الدنيا بإيه؟

غيرشي الانسان مغرور.!!







ولسه يامنة حاتعيش وحاتلبس

لمّا جايب لي قطيفة وكستور؟

كنت اديتهمني فلوس

اشتري للركبه دهان.

آ..با..ي ما مجلّع قوي يا عبد الرحمان.







طب ده انا ليّا ستّ سنين

مزروعة في ظهر الباب

لم طلّوا علينا أحبة ولا أغراب.

خليهم..

ينفعوا

أعملهم أكفان.!!







كرمش وشي

فاكر يامنة وفاكر الوش؟

إوعى تصدقها الدنيا..

غش ف غش.!!

إذا جاك الموت يا وليدي

موت على طول.

اللي اتخطفوا فضلوا أحباب

صاحيين في القلب

كإن ماحدش غاب.

واللي ماتوا حتة حتة

ونشفوا وهم حيين..

حتى سلامو عليكم مش بتعدي

من بره الأعتاب







أول مايجيك الموت .. افتح.

أو ماينادي عليك .. إجلح.

إنت الكسبان.

إوعى تحسبها حساب.!!

بلا واد .. بلا بت..

ده زمن يوم مايصدق .. كداب.!!

سيبها لهم بالحال والمال وانفد

إوعى تبص وراك.







الورث تراب

وحيطان الأيام طين

وعيالك بيك مش بيك عايشين..!!







يو.....ه يا رمان..

مشوار طولان

واللي يطوِّله يوم عن يومه يا حبيبي .. حمار

الدوا عاوزاه لوجيعة الركبة

مش لطوالة العمر.

إوعى تصدق ألوانها صفر وحمر.







مش كنت جميلة يا واد؟

مش كنت وكنت

وجَدَعَة تخاف مني الرجال ..؟

لكن فين شفتوني ..؟

كنتوا عيال.!!







بناتي رضية ونجية ماتوا وراحوا

وأنا اللي قعدت.

طيِّب يا زمان..!!

إ

إوعى تعيش يوم واحد بعد عيالك

إوعى يا عبد الرحمان.







في الدنيا أوجاع وهموم أشكال والوان.

الناس مابتعرفهاش.

أوعرهم لو حتعيش

بعد عيالك ماتموت.







ساعتها بس ..

حاتعرف إيه هوّه الموت.!!







أول مايجي لك .. نط







لسه بتحكي لهم بحرى حكاية

فاطنة وحراجي القط..؟







آ.. باي ماكنت شقي وعفريت

من دون كل الولدات.

كنت مخالف..

برّاوي..

وكنت مخبي في عينيك السحراوي

تمللي حاجات.







زي الحداية ..

تخوي ع الحاجة .. وتطير .

من صغرك بضوافر واعرة .. ومناقير.

بس ماكنتش كداب.

وآديني استنيت في الدنيا

لما شعرك شاب..!!







قِدِم البيت.

اتهدت قبله بيوت وبيوت.

وأصيل هوه..

مستنيني لما أموت..!!







حاتيجي العيد الجاي؟

واذا جيت

حاتجيني لجاي؟

وحتشرب مع يامنة الشاي .؟؟







حاجي ياعمة وجيت..

لالقيت يامنة ولا البيت ..!!




-----------------------------------------------



ياعنكبـــوتة

********

يا عنكبوتة كملي عشك

لا حد حيزيحك

ولا يهشك

لمي مهاجرينك

وثبتي دينك

اتمطعي

وخدينا في وشك

بلاد بلا عزة

ممكن تجيبي اجلها من هزة

بلا ضفة

بلا غزة

بالدم رشي اللي بماء رِِشك

وكملي عشك

لمي مهاجرينك

ولو ملايين

يا عنكبوتة

احنا مش فاضيين

مدي الخيوط خيط خيط

واكسي كل الحيط

نامي بأمان

واتمطعي بفرشك

من وشنا ما بنسمعوش وشك

لمي مهاجرينك

وتعاليلي

لا تهم تباريري وتعاليلي

انا في الخلا بنفخ شعاليلي

واوزن قوافي وتفاعيلي

اغش نفسي وعمري ما اغشك

واحش روس اهلي ولا احشك

حتعيشي ابد الدهر

حتوحديها انتي نهر ونهر

نشي اللي ما قدروش على نشك

انا زي ما بعت السنين الخرس

ورضيت بربع الربع خمس الخمس

مجاني حوهبلك عيون القدس

مين اللي سألك تتركي عرشك؟

طب دحنا خدامك

في النوم بنوحيلك باحلامك

واحنا اللي بنحققها قدامك

اسف..

سكوتي ربما دوشك!

فتربصي بينا ولا يهمك

دمنا فدى دمك

وبعترينا واحنا بنلمك

ولو تحاصرك الامم

ويكتفوكي بالتهم

احنا سبيلك للخلاص في الكون

لما تضيق ..

دايما بيطلع مننا مجنون

يهتف يعيش صهيون

ونغش بعضينا ولا نغشك

بالعكس

بندلع

وبنهشك

ناكل في بعض

فيتملي كرشك

وقرشنا بثانية يصير قرشك

يا عنكبوتة

انتي

وزعيقنا

واصواتنا

ودم احياءنا وامواتنا

هدي عشوشنا

وكملي عشك

لا حد حيزيحك

ولا يهشك

لا حد حيزيحك

ولا يهشك


--------------------------------


فينك يا عبد الحليم

فين صوتك اللى كان

فرح وهموم

وكان سما بنجوم

اللى طلع م القلب

عارف يعيش..ويدوم

فينك يا عبد الحليم

فينك

يا احلا من يغنى الفراق

تيجى تغنى زحمة الشهداء

والدم فى فلسطين

وعلى توب العراق

فينك يا عبد الحليم

فينك يا زارع الحلم

بعد الحلم

بعد الحلم

الدنيا.. ريح.. وغيوم

الدنيا ..موت ..وسموم

ولا حد سامع

صرخة المظلوم

ولا انة المهموم

الدنيا منتظرة صوتك

ومحوشالك هم

اكتر من الايام

الدنيا منتظرة صوتك

ليه رحت قوام

ضاقت مساحة الكلام

والشوك

ما زال يوعد بصحبة ورد

الشوك خسيس

عمره ما يوفى بعهد

الشوك- كما تعرف

خبيث ..خوان

وفجرنا اعمى

ساكت ما لهش ادان

وكل صبح جديد

بحزن قديم

فينك يا عبد الحليم

لا عاد حبيب ينضم

ولا عبير ينشم

ولا ضحكة ملو الفم

هربت ليه يا عم

مش كنت تنتظر الليالى الهم

ملونة فلسطين

بطعم الدم

والضحكة

اناتنا ..اذا تتلم

وكل مانشد الامل

ننشد

الكل راحل .. والجناح منحول

فى غربة تقتل قلبنا المقتول

رحل فى صوتك

احلى ما فى صوتى

ورحل بموتك

فرحتى بموتى

هاربة الحدود وبيطاردها الحد

الاغتصاب

ما لوش حدود ولا حد

كله بيرحل

من دموع الخد

للشهدا

نايمين ع الكتاف .. واليد

ابدان

بطول حزن الحياة ..تتمد

صوت البيوت الطيبة

بتتهد

صرخة وليد اخضر

صرخها بجد

الطيارات

الحراتات

الجرافات

تقتل تاريخ الارض

والحزن

خيط ضى الاسى الممتد

الحزن صاحب حميم

فينك يا عبد الحليم

فينا احنا يا عبد الحليم دلوقت

مين اللى قتل الثانى فينا

احنا والا الوقت

اتعسا فى الحياه

النوم وقلة الانتباه

الصمت والصوت

يبقوا شىء واحد

سكت والا نطقت

الكل فى البعد اتنسى صوته

وانا اللى للصوت القديم

اشتقت

فينك يا عبد الحليم

فات ايه

وامتى

وكام

هل لما غنينا الوطن

كنا بنفرش بيه على الرصفان

وناكل الساقطة من الاغصان

نتجاهل النكسة ورا النكسة

ونندغ التواريخ والاحزان

ويشتم الشاتم

نقول " احسنت

والامة تدخل دايرة التحريم

فينك يا عبد الحليم

انا هنا

اشبه غروب لشعر والاحلام

انا هنا

مطرح ما مديت ايد وقلت سلام

فارش فى ضلة حيرة الايام

انا ياللى كنت مليح

والخلق شردها عويل الريح

الدنيا تزحم فى طريق مسدود

تلف قدامى وخلفى عباد

وكانى مش موجود

وكان عمرى ما خش قلبى ناس

فى وشى تقرا ملامح الامة

الضلمة نور والنور جبال ضلمة

اهتف انادى بحق من غير صوت

اهتف انادى حق

شبعان موت

اتدلدلت فتايل القناديل

واتنجست سجادة المواويل

مهر الفساد

وسط الخلا مفلوت

وباقول يا ليل

ارواحنا متباعة بتمن الموت

كل الجرتح ما تئن

شوقى القديم بيحن

لحبر غير الحير

وشعر غير الشعر

وسن غير السن

ازاى هربت

من البلا الى يجن

وزمن ينسى اللى يئن..يئن

تعال شوف الدنيا

من غير حسن من غير ناس

وانا بنفس الؤم

نفس الطريقة القديمة

فى زحام البكم

بارخى لجامى

واخدع السياس

فينك يا عبد الحليم

مين اللى

هيحصد آهات الارض

ويبلغ الاحساس

انا اللى مسكون بالسكوت

لو موت ..ما نيش ملفوت

وانت

بتضحك جنب منى ..تفوت

الكدب مالى الكون

الكدب ما لوش لون

الكدب ..بلع الالسنة والصوت

مين اللى ردم اللون ده

فى الاحزان

مين اللى ردم الاهل

تحت الهد

مين اللى خان يونس

سؤال فى خان يونس

عليه

ما جاوبنى ابدا..حد

فينك يا عبد الحليم

الامة بتعانى وبتعانى

ما عادتش نفس الامة

نفس الخلق

والكدب

ما عادش زى ما كان ايامك

زما عادش نفس الحق هوة الحق

ارحل باحلامك

رحل زماننا يا صاحبى

قدامى وقدامك

وامتك

بكدبها اتباهت

الامة

فى دروب الاسى تاهت

الامة زى العادة بتعانى

لكن معاناه ..كدب ..برانى

مش زى ما كانت

آدى المسيح

شايل صليب تانى

اظنه غير دكهة

دهه..باهت

عن وصفه عاجزة كل احزانى

والعدرا

من يوم البكا بتبكى

ولدها مقتول

ع الصليب..متكى

الدمع مات

من كتر ما ناحت

كل النسا فى ارض وجيل

ليها ولاد ماتت

العدرا تبكيهم سوا..وتئن

تبكى

وتتدارى ف صليب الابن

يا ام المسيح

من قعدتك قومى

آدى الصهاينة بيمشوا فى دروبى

وقلعونى ..ومشيوابهدومى

والحزن

فى القلب القديم ..فاحت

وف كربلاء

آدى الشهيد..محمول

كل العراق

زى الحسين مقتول

والدنيا فاهمة

وانا اللى لسه غشيم

فينك يا عبد الحليم

اهو زى ما سبتنى

يوم الرحيل ونويت

وسمعت بالموتة وانا

باعبر طريق..ومشيت

ولا كانك مت

كملت خطوى وفت

ما حصلش غير

طراطيش اغانى وضحك

وهموم وطنية

تمر زى الطير

وصوت

ما عادش يدق باب البيت

وانا فى الحقيقة

مش باقول مشتاق

عشان مشتاق

كل الحكاية

فى زنقة الاوطان

وميلة الميزان

لما تخوى حدادى اللوعة

والغربان

كنت انت نافعنى

اذا قلت يا فلسطين او يا عراق

او اغنى احلامنا اللى ضاعوا هباء

وكل يوم اوطان

بيغيبوا فى الاجواء

يغيب عنا الصوت

وتفضل الاصداء

ويتملى الجورنان

بضحكة الاعداء

وقليلة ع الكلب

قولة لئيم

وانا فينك يا عبد الحليم

كتبت سطرين

بس كنت حزين

ادى ورقتى لمين

فينك

نغنى تانى موال النهار

يا صاحب الرحلة ف طريق الشوك

انت ما متش

هم شبعوا موت

المسالة مش صوت

المسالة

هم الجميع يتحضن

المسالة

تترجم المعاناة..وطن

المسالة امتنا فى التيه

تفتكر

وتنتفض

وتعود

تنفض غبار الياس

على رمل الحدود

نمر من باب الوجود

نعيش جنود ونموت حنود

نفضح ونهزم العدو

مازال يحاربنا بكل سلاح غشيم

نفضح ونهزم العدو

نفس العدو الندل القديم

كما فعلنا ف مصر

لاجل النصر

مش ده اللى خلاك فى الضمير

عبد الحليم



----------------------------------



ولد عام 1938 في قرية أبنود بمحافظة قنا في صعيد مصر، لأب كان يعمل مأذوناً شرعياً وهو الشيخ محمود الأبنودي، وانتقل إلى مدينة قنا وتحديداً في شارع بني على حيث استمع إلى اغاني السيرة الهلالية التي تأثر بها. الشاعر عبد الرحمن الأبنودي متزوج من المذيعة المصرية نهال كمال وله منها ابنتان آية ونور.
كتبه
من أشهر أعماله السيرة الهلالية التي جمعها من شعراء الصعيد ولم يؤلفها. ومن أشهر كتبه كتاب (أيامي الحلوة) والذي نشره في حلقات منفصلة في ملحق أيامنا الحلوة بجريدة الأهرام تم جمعها في هذا الكتاب بأجزائه الثلاثة، وفيه يحكي الأبنودي قصصاً وأحداثاً مختلفة من حياته في صعيد مصر.
صدر مؤخرًا عن دار "المصري" للنشر والتوزيع، كتاب "الخال" للكاتب الصحفي محمد توفيق، يتناول فيه سيرة الشاعر عبد الرحمن الأبنودي الذاتية. يرصد الكتاب قصص الأبنودي الآسرة، وتجاربه المليئة بالمفارقات والعداءات والنجاحات والمواقف.
في مقدمة كتابه، يقول توفيق: "هذا هو الخال كما عرفته.. مزيج بين الصراحة الشديدة والغموض الجميل، بين الفن والفلسفة، بين غاية التعقيد وقمة البساطة، بين مكر الفلاح وشهامة الصعيدي، بين ثقافة المفكرين وطيبة البسطاء.. هو السهل الممتنع، الذي ظن البعض - وبعض الظن إثم - أن تقليده سهل وتكراره ممكن".
دواوينه الشعرية
الأرض والعيال (1964 - 1975 - 1985).
الزحمة (1967 - 1976 - 1985).
عماليات (1968).
جوابات حراجى القط (1969 - 1977 - 1985).
الفصول (1970 - 1985).
أحمد سماعين (1972 - 1985).
انا والناس (1973).
بعد التحية والسلام (1975).
وجوه على الشط (1975 - 1978) قصيدة طويلة.
صمت الجرس (1975 - 1985).
المشروع والممنوع (1979 - 1985).
المد والجزر (1981) قصيدة طويلة.
الأحزان العادية (1981) ديوان مكتوب دراسة (محمد القدوسى).
السيرة الهلالية (1978) دراسة مترجمة.
الموت على الأسفلت (1988 - 1995) قصيدة طويلة.
سيرة بنى هلال الجزء الأول (1988).
سيرة بنى هلال الجزء الثاني (1988).
سيرة بنى هلال الجزء الثالث (1988).
سيرة بنى هلال الجزء الرابع (1991).
سيرة بنى هلال الجزء الخامس (1991).
الاستعمار العربي (1991 - 1992) قصيدة طويلة.
المختارات الجزء الأول (1994 - 1995).
أعماله المغناة وكتاباته للسينما
كتب الأبنودي العديد من الأغاني، من أشهرها:
عبد الحليم حافظ :عدى النهار، المسيح، أحلف بسماها وبترابها، إبنك يقول لك يا بطل، أنا كل ما أقول التوبة، أحضان الحبايب، اضرب اضرب، إنذار، بالدم، بركان الغضب، راية العرب، الفنارة، يا بلدنا لا تنامي، صباح الخير يا سينا، وغيرها
محمد رشدي: تحت الشجر يا وهيبة، عدوية، وسع للنور، عرباوى
فايزة أحمد: يمّا يا هوايا يمّا، مال علي مال، قاعد معاي
نجاة الصغيرة[2][3] : عيون القلب، قصص الحب الجميلة
شادية: آه يا اسمراني اللون، قالى الوداع، أغانى فيلم شيء من الخوف
صباح: ساعات ساعات
وردة الجزائرية: طبعًا أحباب، قبل النهاردة
محمد قنديل: شباكين على النيل عنيكي
ماجدة الرومي: جايي من بيروت، بهواكي يا مصر
محمد منير: شوكولاتة، كل الحاجات بتفكرني، من حبك مش بريء، برة الشبابيك، الليلة ديا، يونس، عزيزة، قلبى مايشبهنيش، يا حمام، يا رمان
نجاح سلام: شئ من الغضب.
مروان خوري: دواير.
كما كتب أغاني العديد من المسلسلات مثل "النديم"، و(ذئاب الجبل)وغيرهاوكتب حوار وأغاني فيلم شيء من الخوف، وحوار فيلم الطوق والإسورة وكتب أغاني فيلم البريء وقد قام بدوره في مسلسل العندليب حكاية شعب الفنان محمود البزاوي. شارك الدكتور يحيى عزمي في كتابة السناريو والحوار لفيلم الطوق والاسورة عن قصة قصيرة للكاتب يحيى الطاهر عبد الله.
وفاته
توفى عصر يوم الثلاثاء الموافق 21 أبريل 2015 وذلك بسبب كثرة تدخينه مما تسبب بضرر فى رئته.
جوائز عبد الرحمن الأبنودي
حصل الأبنودي على جائزة الدولة التقديرية عام 2001، ليكون بذلك أول شاعر عامية مصري يفوز بجائزة الدولة التقديرية.
فوز الأبنودي بجائزة محمود درويش للإبداع العربي للعام 2014.










_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى