موسوعة شعراء العاميه المصريه /مجدى طه
صفحة 1 من اصل 1
موسوعة شعراء العاميه المصريه /مجدى طه
أ..ب .. مشاعر
8 ديسمبر، 2010، الساعة 01:23 مساءً
إهداء ألى زوجتي الحبيبة
المسافة اللي ما بيننا
زي بين النور .. ومصر
قد بعد القلب عن أقرب
سكن
طولها عمر
طولها فجر مالوهش
ولادة
قهوة سادة
مرة علقم
لون هزيمة برشلونة م المحلة
خمسة صفر..
علميني يا حبيبتي ..
اعرف ابعد
عن عيونك..
علميني اكتب لحدك
والحروف تقدر
تكونك
حددي وشي بملامحك
يمكن اما اغيب يقولوا
أني شبهك
فافتكر بملامحي
كونك
كلمتين احتلوا ودني
من كلامك
(يا حبيبي)
بس صوتك كان عازفهم
كان عارفهم مستحيل يفترقوا عني
كان ناقصني انك تغني
وانتي بتسلم عليكي
كل حتة نبض فيا
تعرفي اني بحبك؟؟
واستحالة ف يوم اقول لك
قد إيه
مانتي عارفه
ان لما بتسأليني عن مشاعري
امتحانك صعب جدا
غششيني
لاني جنبك
ببقى أبلد شخص ف قراية
هواكي
طالت الأيام بقى
واللي شلته ف بعدي عنك
كان كتير ..
كان يزيد عن وزن بحر بميته
بسفنه برياحه
بطول سواحله بقوقعاته بملاحينه بمداحينه
بالسحاب اللي عبر
فوقه .. وداب
نفسي ينتحر الغياب
نفسي اموت مشنوق في حضنك
احضنيني
عارف انك محتاجالي ومشتاقالي
وعاتبه ع الأيام بدالي
حاجة واحدة يا حبيبتي طالبها منك
لما تتقابل عينينا
دخليني جنتك
من غير حساب..
--------------------------
إعدام(نثرية)
بيوت بلدنا حزينة
ساعة المغرب
بهتانة اضائتها
متكركبة فيها حاجات
وعفار على وش البيوت مش مخلي الضي يخرج
ولا نور البيوت يبان
حلم النجاح بعد التعب في الثانوية
قبض الجمعية الاول
شيلة هم المواصلات للشغل
كوي البنطلون مبلول
حلم العلاوة اللي مستنية على باب السما
امضة رئيس المصلحة او وزيرة التامينات
علاج فايروس الكبد من غير حقن تدمر الكلية
تغيير انبوبة الغاز اللي لسه فيها النفس قبل ما تتخنق
بيوت .. من غير هوا تتنفسه
مع ان الغيطان واسعة
ومراوح السما بتدور
ابويا من اكتر من عشر سنين ميت
بس ماكانتش البيوت ايامه لونها كده
كانت ونس
كانت بتلبس كل يوم فستان وترقص
وقت اما كان يربط العجلة القديمة ف ماسورة المية بسلسلة ضهره
وترن مفاتيحه في ودني رنة سبوع
ساعة ما يفتح باب قلبي
ويدخل ونتعشى لقا
الله يرحمك يا فرح
هدد البيوت مش حل علشان ابتسامتي تعود
مطلوب نموت الضلمة
9/9/2012
-------------------------
نشيد المعتصمين
في أحد البرامج التليفزيونيه استضافوا شاب من معتصمي مجلس الوزراء فقال في حديثة ان معتصمي مجلس الوزراء هم صفوة شباب الثورة وصفوة شباب مصر
بصراحة استفزني فكتبت لهم نشيد
نشيد المعتصمين
إحنا الصفوة المعتصمين
وعيال قابضة شمال ويمين
اللي بيربط شعره بفتلة
واللي مضيع دنيا ودين
إحنا الصفوة المعتصمين
معتصمين هنولْع فيها
اهي دنيا محصلة بعضيها
لا هدفنا ثورة ولا نيلة
هي رخامه..عيال مجانين
إحنا الصفوة المعتصمين
معتصمين وعيال تعبانه
والدنيا ولا فارقة معانا
بنقضي الوقت كلام فاضي
هوايتنا نضر التانيين
إحنا الصفوة المعتصمين
معتصمين علشان ترتاحوا
وتقولوا رجعوا وتقولوا راحو
عايزين شهرة كلام ف يبرامج
ولا نفهمشي مين مع مين
أحنا الصفوة المعتصمين
معتصمين وعيال طبًالة
ولا نملك أوضه ولا صالة
وعواطلية وشوارعية
رجالة بتلبس فساتين
إحنا الصفوة المعتصمين
معتصمين علشان نخربها
عاشت الموجه واللي راكبها
نحرق نسرق ننهب نضرب
ولا اخوان ولا سلفيين
إحنا الصفوة المعتصمين
معتصمين معرفش ازاي
ولا عشان ايه ولا حتى..هواي
اهو كده بقى معنى الحرية
إنك تخرب بيت ملايين
إحنا الصفوة المعتصمين
أسماء محفوظ أو نوارة
أو وائل افندي ابو نضارة
هما مثلنا الأعلى يا صاحبي
سلم لنا ع المصريين
إحنا الصفوة المعتصمين
مجدي طه
16-12-2011
الشاعر مجدى طه
عضو نادى الادب بمغاغه بالمنيا
مواضيع مماثلة
» موسوعة شعراء العاميه المصريه /مجدى نجيب
» موسوعة شعراء العاميه المصريه / مجدى نجيب
» موسوعة شعراء العاميه المصريه / مجدى الجابرى
» موسوعة شعراء العاميه المصريه / مجدى عبد الرحيم
» موسوعة شعراء العاميه المصريه / منى المنير
» موسوعة شعراء العاميه المصريه / مجدى نجيب
» موسوعة شعراء العاميه المصريه / مجدى الجابرى
» موسوعة شعراء العاميه المصريه / مجدى عبد الرحيم
» موسوعة شعراء العاميه المصريه / منى المنير
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى